• 
  

കൊവിഡ് വീട്ടിലെ പരിചരണം  ശ്രദ്ധിക്കാം ഈ കാര്യങ്ങൾ

കൊല്ലം : കൊവിഡ് മൂന്നാംതരംഗത്തിൽ വ്യാപനം കൂടിയെങ്കിലും രോഗതീവ്രത കുറവായതിനാൽ രോഗികളിൽ കൂടുതൽപേരും വീട്ടിലാണ് കഴിയുന്നത്. ഗുരുതര ലക്ഷണങ്ങളോ മറ്റ് അസുഖങ്ങളോ ഇല്ലെങ്കിൽ നല്ല ഭക്ഷണവും വിശ്രമവും മരുന്നുമായി സുരക്ഷിതമായി വീട്ടിൽ നിരീക്ഷണം പൂർത്തിയാക്കാം. ശ്രദ്ധയും ജാഗ്രതയും പുലർത്തണം. 60 ന് മുകളിൽ പ്രായമുള്ളവർക്കും മറ്റ്് അസുഖങ്ങളുള്ളവർക്കും പ്രത്യേക ശ്രദ്ധയും പരിചരണവും നൽകണമെന്ന് ജില്ലാ മെഡിക്കൽ ഓഫീസർ ഡോ. നാരായണ നായ്ക് അറിയിച്ചു.

വീട്ടിലെ പരിചരണത്തിനുള്ള പ്രധാന നിർദേശങ്ങൾ

*പനി, തൊണ്ടവേദന, ചുമ, ശരീരവേദന തുടങ്ങിയ ലക്ഷണങ്ങൾ കണ്ടാൽ പരിശോധനാഫലത്തിന് കാത്തുനിൽക്കാതെ ക്വാറന്റീനിൽ പ്രവേശിക്കണം. വീട്ടിൽ ഗുരുതര അസുഖമോ പ്രായമുള്ളവരോ ഉണ്ടെങ്കിൽ അവരുമായുള്ള സമ്പർക്കം ഒഴിവാക്കണം

. *മാസ്ക് ധരിക്കണം: എൻ 95 മാസ്കോ മൂന്ന് പാളി മാസ്കോ ധരിക്കണം അല്ലെങ്കിൽ തുണിമാസ്ക് ഇടുകയാണെങ്കിൽ ഡബിൾ മാസ്ക് ധരിക്കണം. *ആന്റിബയോട്ടിക് മരുന്നുകൾ വാങ്ങി സ്വയം ചികിത്സ പാടില്ല. പനിയോ, ചുമയോ ഉണ്ടെങ്കിൽ ടെലിമെഡിസിൻ വഴിയോ വാർഡ്തല ആരോഗ്യപ്രവർത്തകർ വഴിയോ മരുന്ന് ലഭ്യമാക്കണം.

*നന്നായി വെള്ളം കുടിക്കണം. പഴങ്ങളും പച്ചക്കറിയും ഉൾപ്പെടുത്തി സമീകൃതാഹാരം കഴിക്കുക.

*മാനസിക സമ്മർദങ്ങളോ ആശങ്കകളോ ഇല്ലാതെ വിശ്രമിക്കണം.

*പനി, ഓക്സിജൻ അളവ്, പ്രമേഹം, ബി.പി. എന്നിവ പരിശോധിക്കാനുള്ള സംവിധാനം കരുതണം. 100 ഡിഗ്രി ഫാരൻഹീറ്റിൽ ഉള്ള പനി മൂന്നുദിവസത്തിൽ കൂടുതൽ നിൽക്കുകയാണെങ്കിൽ ഡോക്ടറുമായി ബന്ധപ്പെടണം.

*നെഞ്ചിൽ കനം, കിതപ്പ്, ശ്വാസംമുട്ടൽ വലിയ ക്ഷീണം, ഓക്സിജൻ അളവ് 94-ൽ താഴെയാവുക എന്നിവയുണ്ടായാൽ ആരോഗ്യ പ്രവർത്തകരുമായി ബന്ധപ്പെടണം. *ഓക്സിജൻ അളവ് നോർമൽ (94-ൽ കൂടുതൽ) ആണെങ്കിലും ദിവസത്തിൽ ഒരുതവണ ആറുമിനുട്ട് വാക്‌ ടെസ്റ്റ് എടുക്കണം. സാധാരണ നടക്കുന്ന വേഗത്തിൽ മുറിക്കകത്ത് ആറ് മിനിറ്റ് നടന്നശേഷം ഓക്സിജൻ അളവ് പരിശോധിക്കണം. ഇത് നേരത്തേയുള്ള ഓക്സിജൻ അളവിനെക്കാളും രണ്ടുപോയിന്റ് താഴെയാണെങ്കിൽ ആരോഗ്യപ്രവർത്തകരെ ബന്ധപ്പെടണം.

*60 വയസ്സിന് മുകളിലുള്ളവർക്കും, പ്രമേഹം, ബി.പി. തുടങ്ങിയ മറ്റ്‌ അസുഖങ്ങളുള്ളവർക്കും കൂടുതൽ ശ്രദ്ധയും നിരീക്ഷണവും നൽകണം. പ്രമേഹം, ബി.പി. എന്നിവ പരിശോധിക്കണം. നിലവിൽ കഴിക്കുന്ന മരുന്നുകൾ തുടരാം.

*ഏഴുദിവസം കഴിഞ്ഞ് ലക്ഷണങ്ങളില്ലെങ്കിൽ പുറത്തിറങ്ങാം. മാസ്ക് ധരിക്കൽ കർശനമായി തുടരണം.

*വീട്ടിലുള്ള മറ്റുള്ളവർക്ക്‌ ലക്ഷണമില്ലെങ്കിൽ നിലവിൽ കൊവിഡ് പരിശോധന വേണ്ട.