ഉച്ചഭഷണ പദ്ധതി അധ്യാപകര്‍ക്ക് അധിക ബാധ്യത

ഉച്ചഭഷണ പദ്ധതി  അധ്യാപകര്‍ക്ക് അധിക ബാധ്യത

കൊല്ലം : കോവിഡിനുശേഷം സ്കൂളുകൾ തുറന്നതോടെ ഉച്ചഭക്ഷണ പദ്ധതി അധ്യാപകർക്ക് അധികച്ചെലവാകുന്നു. മൂന്നുദിവസം വരുന്ന വിദ്യാർഥികൾക്ക് പഴയതുപോലെ മുട്ടയും പാലും നൽകേണ്ടതും 2016 ൽ തീരുമാനിച്ച പാചകച്ചെലവ് തുക പുതുക്കാത്തതുമാണ് അധ്യാപകരെ ബുദ്ധിമുട്ടിലാക്കുന്നത്.

കോവിഡിന് മുൻപ് ആഴ്ചയിൽ രണ്ടുദിവസം 150 മില്ലിലിറ്റർ വീതം പാലും ഒരുദിവസം മുട്ടയും എന്നതായിരുന്നു വിദ്യാർഥികളുടെ മെനു.

അഞ്ചുദിവസത്തെ ഭക്ഷണ അറ്റൻഡൻസ് അനുസരിച്ചാണ് ഇപ്രകാരം മുട്ടയും പാലും നൽകിയിരുന്നത്. ഇതനുസരിച്ചാണ് വിദ്യാഭ്യാസവകുപ്പ് ബിൽ അനുവദിക്കുന്നത്.

നിലവിൽ മുട്ടയും പാലും കൊടുക്കുന്ന ദിവസത്തിൽ കുറവ് വന്നില്ലെന്ന് മാത്രമല്ല ഭക്ഷണ അറ്റൻഡൻസ് മൂന്നുദിവസമായി കുറയുകയും ചെയ്തു.

ഉച്ചഭക്ഷണ പദ്ധതിയിൽ 200 കുട്ടികളുള്ള സ്കൂളിൽ കോവിഡ് മാനദണ്ഡ പ്രകാരം ഒരുദിവസം ഹാജരാവുന്നത് 100 കുട്ടികളാണ്. 100 കുട്ടികൾക്ക് രണ്ടുദിവസം 150 മില്ലിലിറ്റർ വീതം പാൽ നൽകാൻ 1500 രൂപ വേണ്ടിവരും. ഒരുദിവസം മുട്ട നൽകാൻ 500 രൂപയാണ് ചെലവ്. ഉച്ചഭക്ഷണമൊഴികെ 2000 രൂപ ചെലവുവരുന്നതാണ് സ്കൂളിലെ ഭക്ഷണ വിതരണം.

ഉച്ചഭക്ഷണമടക്കം വിദ്യാഭ്യാസവകുപ്പ് അനുവദിക്കുന്നത് 2400 രൂപയാണ്. 150 കുട്ടികൾവരെ ഭക്ഷണം കഴിക്കുന്ന സ്കൂളുകൾക്ക് പ്രതിദിനം ഒരുകുട്ടിക്ക് എട്ട് രൂപയാണ് വിദ്യാഭ്യാസവകുപ്പ് അനുവദിക്കുന്നത്.

ബാക്കിയുള്ള 400 രൂപ ഉപയോഗപ്പെടുത്തി വേണം വിദ്യാർഥികൾക്ക്മൂ ന്നുദിവസത്തേക്ക് രണ്ട് കറിയും ചോറുമടങ്ങുന്ന ഉച്ചഭക്ഷണമൊരുക്കാൻ.

@ ചെലവ് പുതുക്കിയത് നാലുകൊല്ലം മുൻപ്

2016 സെപ്റ്റംബറിലാണ് സ്കൂളുകളിലെ ഉച്ചഭക്ഷണ പാചകച്ചെലവ് അവസാനമായി പുതുക്കിയത്. ഇത് ഉയരുന്നത് ഉച്ചഭക്ഷണ പദ്ധതി നടത്തിപ്പുകാരായ പ്രഥമാധ്യാപകർക്ക് അധികച്ചെലവ് വരുത്തുമെന്നാണ് അധ്യാപകർ പറയുന്നത്. സർക്കാർ ഒരുദിവസം കണക്കാക്കുന്നതിന്റെ അത്രയും രൂപ ഉച്ചഭക്ഷണച്ചുമതലയുള്ള അധ്യാപകർക്ക് അധിക ബാധ്യതയാണ്.

ഗ്യാസ്, പച്ചക്കറി, പലവ്യഞ്ജനങ്ങളുടെ വിലവർധനയ്ക്ക് ആനുപാതികമായി പാചകച്ചെലവ് ഉയർത്തിയിട്ടില്ല. നേരത്തെ ആഴ്ചയിൽ രണ്ടുദിവസം നൽകിയിരുന്ന പാൽ രണ്ട് ബാച്ചുകളുള്ള സ്കൂളുകളിൽ നിലവിൽ നാലുദിവസം നൽകണം. മുട്ട ഒരുദിവസം നൽകിയത് രണ്ടുദിവസമായി. ഇതോടൊപ്പം പാചകവാതകവും കടത്തുകൂലിയും കണക്കാക്കുമ്പോൾ വലിയൊരു സംഖ്യ അധ്യാപകരുടെ കൈയിൽനിന്ന് പോകുന്ന അവസ്ഥയാണെന്നാണ് അധ്യാപകർ പറയുന്നത്