കൊല്ലം ജില്ലയ്ക്ക് പനിക്കുന്നു

കൊല്ലം: ജില്ലയിൽ ആരോഗ്യവകുപ്പിന്റെ 

കണക്കുകൂട്ടൽ തെറ്റിച്ച പനിക്കാലമെത്തി ജില്ലയിൽ പ്രതിദിന രോഗികളുടെ എണ്ണം 1500ലേക്ക് കടക്കുന്നു. ചെറുതും വലുതുമായ 

സ്വകാര്യ ആശുപത്രികളിൽ പനിയുടെ ചികിത്സ തേടി എത്തുന്ന രോഗികളുടെ കൂടെ കണക്കെടുത്താൽ പ്രതിദിനം 2500-3000 കടക്കുമെന്ന് ആരോഗ്യ വകുപ്പ് അധികൃതർ തന്നെ പറയുന്നു.

പനിയടക്കമുള്ള പകർച്ചവ്യാധികൾ ബാധിച്ച് പതിവിൽക്കൂടുതലാളുകൾ ദിനവും ചികിത്സതേടിയെത്തുന്നതായി സ്വകാര്യ ആശുപത്രിക്കാർ പറയുന്നു. ജൂണിൽ തന്നെ പ്രതിദിന രോഗികളുടെ എണ്ണം ആയിരത്തിനു മുകളിലെത്തിയിരുന്നു ജൂലൈ 10കഴിഞ്ഞതോടെ അത് 1500ലേക്ക് ഉയർന്നു. അതോടെ ജില്ലയിലെ ആരോഗ്യവകുപ്പിന്റെ ചികിത്സ സമ്പ്രദായം താളം തെറ്റി ആശുപത്രികളിൽ രോഗികളെ കൊണ്ട് നിറഞ്ഞു. ഇന്നലെ മാത്രം ജില്ലയിലെ സർക്കാർ ആശുപത്രികളിൽ പനി ബാധിച്ചു ചികിത്സതേടിയത് 1300 പേരാണ്. വിദ്യാർഥികൾക്കിടയിൽ പനിയും ചുമയും വ്യാപകം. ജില്ല പൂർണ്ണമായും പനിക്കിടക്കയിലായിട്ടും പല ആശുപത്രികളിലും ആകെ കിട്ടുന്നത് പാരസെറ്റാമോൾ അതും ഇല്ലാത്ത പ്രാഥമിക ആരോഗ്യകേന്ദ്രങ്ങളും സബ് സെന്ററുകളും ഉണ്ട്. ജില്ലയിലെ കിഴക്കൻ മേഖലയിലാണ് മരുന്ന് ക്ഷാമം രൂക്ഷമായിരിക്കുന്നത്.ജീവൻ രക്ഷാ മരുന്നുകൾ അടക്കം മിക്ക മരുന്നുകളും ആശുപത്രികളിൽ 

ഔട്ട് ഓഫ് സ്റ്റോക്ക് ആയതോടെ 

ആശുപത്രി ഫാർമസികളിലെത്തുന്ന രോഗികളുടെ മുന്നിൽ കൈമലർത്തുകയാണ് ആശുപത്രി ജീവനക്കാർ. അവശ്യമരുന്നുകള്‍ പോലും കിട്ടാതെ വലയുകയാണ് സാധാരണക്കാരായ രോഗികള്‍.

ജില്ലയിൽ മരുന്ന് ക്ഷാമം തുടങ്ങി ആഴ്ചകൾ പിന്നിട്ടിട്ടും ആരോഗ്യവകുപ്പ് ഒരു നടപടിയുമെടുത്തിട്ടില്ല.

@ ജില്ലയിലെ സർക്കാർ ആശുപത്രികളിൽ മരുന്നില്ല സ്വകാര്യ ആശുപത്രികൾക്കും മെഡിക്കൽ സ്റ്റോറുകൾക്കും ചാകര.

പാരിപ്പള്ളി മെഡിക്കൽ കോളേജിലും ജില്ലാ ആശുപത്രിയിലും ജീവൻ രക്ഷാമരുന്നുകളും മറ്റ് അത്യാവശ്യ മരുന്നുകളും ഇല്ല.സർക്കാർ ആശുപത്രികളിൽ സുലഭമായി ലഭിച്ചു കൊണ്ടിരുന്ന അമോക്സിലിൻ, സെപോഡോക്സിം, സിപ്രോഫ്ളോക്സാസിൻ, സെഫിക്സിം, ഒഫ്ളോക്സാസിൻ, റാബെസോൾ, പാന്റപ്രസോൾ, ഒമേപ്രസോൾ തുടങ്ങിയ മരുന്നുകൾക്കു ക്ഷാമമുണ്ട്. സുലഭമായിരുന്ന റാൻടാകിന്റെ വരെ

ലഭ്യത കുറഞ്ഞു.നെടുങ്ങോലം 

 താലൂക്കാശുപത്രിയിൽ പാരസെറ്റാമോൾ സപ്പോസിറ്ററി, ശരീരവേദനയ്ക്കുള്ള മെഫ്താൽ, വയറുവേദനയ്ക്കുള്ള സൈക്ലോപാം തുടങ്ങിയവയില്ല. ആന്റിബയോട്ടിക്കുകളടക്കമുള്ള അവശ്യമരുന്നുകളുടെ ശേഖരം 

തീർന്നുതുടങ്ങി. കൂടുതൽ മരുന്നുള്ള ആശുപത്രികളിൽനിന്ന് ക്ഷാമമുള്ളിടത്തേക്കു മരുന്നെത്തിച്ചതോടെ  എല്ലാ ആശുപത്രികളിലും മരുന്നില്ലാത്ത അവസ്ഥയിലേക്കു കാര്യങ്ങളെത്തിച്ചു. കഴിഞ്ഞ ദിവസങ്ങളിലായി

@ കൊറോണ ചികിത്സയിലൂടെ ജനങ്ങളുടെ വിശ്വാസിത പിടിച്ചു പറ്റിയ പാരിപ്പള്ളി 

മെഡിക്കൽ കോളേജ് ആശുപത്രിയിൽ ആന്റിബയോട്ടിക്കുകൾ കിട്ടാനില്ല. ചുമയ്ക്കുള്ള സിറപ്പുകളും ലഭിക്കുന്നില്ല.

തിരുവനന്തപുരം മെഡിക്കൽ കോളേജിലേക്കുള്ള റഫർ സെന്ററായി

പാരിപ്പള്ളി മെഡിക്കൽ കോളേജ് മാറിയെന്ന് ഇവിടെ എത്തുന്നവർ പറയുന്നു. പകർച്ച പനിയും കൊവിഡും വീണ്ടും വ്യാപകമായതോടെ ഡ്രിപ്പ് ആയി നൽകാവുന്ന ഐ വി പാരസെറ്റമോൾ മെഡിക്കൽ കോളജ് ആശുപത്രിയിൽ പോലും കിട്ടാനില്ല. അത്യാഹിത വിഭാഗത്തിലടക്കം ഇത് സ്റ്റോക്കില്ല. രോഗി വാങ്ങി നൽകിയാൽ ഇത് നൽകാമെന്ന് പറയുന്ന അവസ്ഥയിലായി ഡോക്ടമാരും. ജീവൻ രക്ഷാ മരുന്നായി ഉപയോഗിക്കുന്ന, അത്യാഹിത വിഭാഗങ്ങളിലും ഐ സി യുവിലും അടക്കം ഒഴിവാക്കാനാകാത്ത മരുന്നുകളായ അഡ്രിനാലിനും , നോർ അഡ്രിനാലിനും ഇല്ല. അടിയന്തിര ഘട്ടത്തിൽ ഇതും പുറത്തുനിന്ന് വാങ്ങിപ്പിക്കുകയാണ് മെഡിക്കൽ കോളജ് ആശുപത്രിയിൽ.

ജില്ലാ ആശുപത്രിയിൽ ഒരു മാസത്തോളമായി മരുന്നുകളെത്തിയിട്ട്. കുട്ടികൾക്ക് പനിക്കുള്ള പാരസെറ്റാമോൾ സപ്പോസിറ്ററി എത്തിയിട്ട് ആറു മാസമായി.

പനിയടക്കമുള്ള പകർച്ചവ്യാധികൾ വ്യാപിക്കുന്ന സാഹചര്യത്തിലും കലാമിൻ ലോഷൻ കിട്ടാനില്ല. പഴയ സ്റ്റോക്കിൽ അവശേഷിക്കുന്ന മരുന്നാണ് നൽകുന്നത്. രണ്ടോ മൂന്നോ ആഴ്ചയ്ക്കുള്ളിൽ എല്ലാ മരുന്നും തീരുമെന്നാണ് ആശുപത്രിയധികൃതർ തന്നെ പറയുന്നത്.കൊട്ടാരക്കര താലൂക്ക് ആശുപത്രിയിലും നെടുങ്ങോലം താലൂക്ക് ആശുപത്രിയിലും മരുന്ന് ക്ഷാമം രൂക്ഷമായി മാറിയിട്ടും നടപടിയെടുക്കാൻ ആരോഗ്യവകുപ്പ് അധികൃതർ തയ്യാറായിട്ടില്ല. സംസ്ഥാനമൊട്ടാകെയുണ്ടായ മരുന്ന് ക്ഷാമമാണ് കാരണമെന്ന് വിശദീകരണം.

@ ജീവൻരക്ഷാമരുന്നുകൾ 

ജില്ലയിലെ  ആശുപത്രികളിൽ ഇല്ല 

ജീവൻ രക്ഷാ മരുന്നുകളിൽ പ്രധാനമായ രക്തം കട്ടപിടിക്കാതിരിക്കാൻ ഹൃദ്രോഗികൾക്ക് നൽകുന്ന ആസ്പിരിൻ 75, ഉയർന്ന രക്ത സമ്മർദത്തിന് നൽകുന്ന റാമിപ്രിൽ, കൊളസ്ട്രോളിന് നൽകുന്ന അറ്റോവ സ്റ്റാറ്റിൻ 20 , പിപ്റ്റാസ്, സെഫ്ട്രിയാക്സോൺ തുടങ്ങി മിക്ക ആൻറിബയോട്ടിക് ഇൻജക്ഷനുകളും കിട്ടാനില്ല. ഇതിൽ തീരുന്നില്ല. ഡയബറ്റിക് രോഗികൾക്കുള്ള ഇൻസുലിൻ , ശിശു രോഗ , ഹൃദ്രോഗ , അർബുദ ചികിൽസക്കുള്ള മിക്ക മരുന്നുകൾക്കും കടുത്ത ക്ഷാമമാണ്.  

@ സാമൂഹികാരോഗ്യകേന്ദ്രങ്ങളിൽ പനിക്കുള്ള മരുന്നുകൾ ആവശ്യത്തിനുണ്ടെങ്കിലും ആന്റിബയോട്ടിക്കുകൾ കിട്ടാനില്ല.

 കുടുംബാരോഗ്യകേന്ദ്രങ്ങളിലും സമാനമായ സ്ഥിതിയാണ്.

സർക്കാർ മരുന്നിനു ക്ഷാമം നേരിട്ടപ്പോൾ തദ്ദേശസ്ഥാപനങ്ങളുടെ

സഹായത്തോടെ പുറത്തുനിന്നു മരുന്നു വാങ്ങിയാണ് പല ആശുപത്രികളും ചികിത്സ തുടരുന്നത്.

ആശുപത്രി മാനേജ്മെന്റ് കമ്മിറ്റി ഫണ്ടും തദ്ദേശസ്ഥാപനങ്ങളുടെ സഹായവും ഉപയോഗിച്ച് ലോക്കൽ പർച്ചേസ് നടത്തിയാണ് പല ആശുപത്രികളും പിടിച്ചുനിൽക്കുന്നത്. ഇങ്ങനെ വാങ്ങിയ മരുന്ന് കൂടുതലും കിടപ്പുരോഗികൾക്കായി മാറ്റിവച്ചിരിക്കുകയാണ്.

@ ആശുപത്രികളിൽ വാക്ക് തർക്കങ്ങൾ പതിവാകുന്നു.

ഒ പി യിലെത്തുന്നവർ ജീവനക്കാരോടു കയർക്കുന്നതും വാക്ക് തർക്കങ്ങൾ ഉണ്ടാവുന്നതും 

പതിവായിട്ടുണ്ട്.