ടൂറിസം പദ്ധതിയ്ക്കായി 1.75 കോടി രൂപയാണ് വകയിരുത്തിയിരുന്നത്.
2014-ൽ ആദിച്ചനല്ലുർ ഗ്രാമപ്പഞ്ചായത്തിന്റെ നേതൃത്വത്തിൽ ആരംഭിച്ച പദ്ധതിയുടെ ഒന്നാംഘട്ടം നിർമാണം 2018 ഒക്ടോബർ ഒന്നിനാണ് മുൻമന്ത്രി കടകംപള്ളി സുരേന്ദ്രൻ ഉദ്ഘാടനം ചെയ്തത്.
പദ്ധതിയിൽ 54 ലക്ഷം രൂപയുടെ പ്രവർത്തനങ്ങൾ ഒന്നാംഘട്ടത്തിൽ പൂർത്തീകരിച്ചു. ജില്ലാ ടൂറിസം പ്രമോഷൻ കൗൺസിലിന്റെ നിർദേശപ്രകാരം ചാത്തന്നൂർ മൈനർ ഇറിഗേഷൻ വകുപ്പിന്റെ നിയന്ത്രണത്തിലാണ് നിർമാണപ്രവർത്തനങ്ങൾ നടത്തിയത്. പിന്നീട് ടൂറിസം വകുപ്പ് ഒൻപതുലക്ഷം രൂപയും കുട്ടികളുടെ പാർക്കിൽ സാങ്കേതിക ഉപകരണങ്ങൾ വാങ്ങാനായി പിന്നീട് നാലുലക്ഷം രൂപയും ബോട്ട് വാങ്ങാനുംമറ്റുമായി ജി.എസ്.ജയലാൽ എം.എൽ.എ.യുടെ പ്രാദേശിക വികസന ഫണ്ടിൽനിന്ന്‌ ആറുലക്ഷം രൂപയും നൽകി.
ലക്ഷങ്ങൾ ചെലവഴിച്ച പദ്ധതിയുടെ ഒന്നാംഘട്ടം കൊട്ടിഘോഷിച്ച് ഉദ്ഘാടനം നടത്തുകയും ചെയ്തു.
കരാറെടുത്തയാൾ ഒരുവർഷത്തോളം തട്ടിയും മുട്ടിയും കൊണ്ടുപോയെങ്കിലും പദ്ധതിയുടെ പൂർണമായ വികസനം നടപ്പാക്കാൻ ബന്ധപ്പെട്ടവർ മുന്നോട്ടുവന്നില്ല. ഇതോടെ ചിറ ടൂറിസത്തിന്റെ പ്രവർത്തനം താറുമാറായി. ലക്ഷങ്ങൾ ചെലവഴിച്ചിട്ടും ഇതിന്റ സംരക്ഷണത്തിന് ഇതുവരെ ഒന്നും ചെയ്യാൻ തയ്യാറാകാത്തതാണ് ടൂറിസം പദ്ധതിയുടെ നാശത്തിനു കാരണമെന്നാണ് ആക്ഷേപം.
ചിറ ടൂറിസം പദ്ധതിയുടെ രണ്ടാംഘട്ടത്തിനുള്ള തുക ഉപയോഗപ്പെടുത്താൻ ഇതുവരെ ഒരുനടപടിയുമുണ്ടായിട്ടില്ല.
ടൂറിസം പദ്ധതിയുടെ ഒന്നാംഘട്ടമായി നിർമിച്ച കുട്ടികളുടെ പാർക്കും ബോട്ടുജെട്ടിയും നാഥനില്ലാക്കളരിയായി. ആദിച്ചനല്ലൂർ വില്ലേജ് ഓഫീസിനുമുന്നിൽനിന്ന് ചെന്തിട്ട ഭഗവതീക്ഷേത്രത്തിനു മുൻവശം വരെയുള്ള ചിറയുടെ കരയിലാണ് കുട്ടികളുടെ പാർക്കും ബോട്ടുജെട്ടിയും നിർമിച്ചിരിക്കുന്നത്. കുട്ടികളുടെ മാനസികോല്ലാസത്തിനായി പാർക്കും വിനോദപരിപാടികൾക്കായി ഊഞ്ഞാൽ, സീസോ, മെറി ഗോറൗണ്ട്‌, റൈസിങ് ട്രോ ബിലാൻ, ബൗൺസിങ്‌ ബലൂൺ എന്നിവയും സൗകര്യപ്പെടുത്തിയിരുന്നു. അവ തുരുമ്പെടുത്ത് നശിച്ചുതുടങ്ങി.
നാലുപേർക്ക് കയറാവുന്നതും രണ്ടുപേർക്ക് കയറാവുന്നതുമായ രണ്ടുബോട്ടുകളാണ് ചിറയിൽ സഞ്ചരിക്കുന്നതിനായി ഒരുക്കിയിരുന്നത്. ഇത് പാർക്കിനോടുചേർന്ന് കെട്ടിയിട്ടിരിക്കുകയാണിപ്പോൾ
ആദിച്ചനല്ലൂർ ഗ്രാമത്തിന് ഏറെ പ്രതീക്ഷ നൽകിയ ചിറ ടൂറിസം ഇനിയെങ്കിലും നല്ലരീതിയിൽ നടത്താൻ അധികൃതർ മുന്നോട്ടുവരണമെന്നാണ് നാട്ടുകാർ ആവശ്യപ്പെടുന്നത്.
No comments:
Post a Comment