കൊട്ടിയം രാസ ലഹരിയുടെ ഹബ്ബ്പല കേന്ദ്രങ്ങളും നിരീക്ഷണത്തിൽ

കൊട്ടിയം രാസ ലഹരിയുടെ ഹബ്ബ്

പല കേന്ദ്രങ്ങളും നിരീക്ഷണത്തിൽ

കൊട്ടിയം : രാസ ലഹരിക്കടിമകളായ യുവാക്കളുടെ ഹബ്ബായി കൊട്ടിയം. മാരക രാസ ലഹരിയായ എം.ടി.എം.എ.യാണ് താരം. കൈവശം ഒളിപ്പിച്ചു കടത്തുന്നതിനും സൂക്ഷിക്കുന്നതിനും സൗകര്യപ്രദമെന്നത് കാരണം ക്യാരിയർമാരുടെ എണ്ണവും കൂടുകയാണ്.മല്ലിഗ്രാമിൻ്റെ ഒരംശമുണ്ടെങ്കിൽ മണിക്കൂറുകളോളം നീളുന്ന ഉന്മാദ ലഹരിയാണ് ഇത് നൽകുന്നത്.മാരകമായ പാർശ്വഫലമാണെങ്കിലും വരുംവരായ്മകളൊന്നും ആലോചിക്കാതെയാണ് യുവത ഇതിൻ്റെ അടിമകളാകുന്നതെന്ന്  എക്സൈസ് 

അധികാരികൾ തന്നെ പറയുന്നു. എക്സൈസും പോലീസും ഒക്കെ ഇതിനെതിരെ ബോധവൽക്കരണവും പരിശോധനയും ഒക്കെ ശക്തമാക്കിയെങ്കിലും എം ഡി എം എയുടെ ഒഴുക്ക് തുടരുകയാണ്.വളരെ ചെറിയ അളവിൽ കടത്തികൊണ്ടു വരുന്ന രാസ ലഹരിയ്ക്ക് തന്നെ ലക്ഷങ്ങളുടെ വില വരും.നിരവധി കളറുകളിലാണ് എം ഡി എം എ ലഭിക്കുക. പിങ്കിനാണ് ഏറെ ഡിമാണ്ട്.കൽക്കണ്ട് രൂപത്തിലുള്ള ചെറിയ കഷണങ്ങൾ നോട്ടിനുള്ളിൽ വച്ച് ഞെരടി പൊടിച്ച് മൂക്കിലൂടെ വലിച്ചു കയറ്റുകയാണ് ഏറെ പേരും. നേരിട്ട് തലച്ചോറിനെ വരെ ബാധിക്കുന്ന മാരകമായ പാർശ്വഫലങ്ങളാണ് ഇതു കാരണമുണ്ടാകുക.

                                               കൊട്ടിയത്ത് വിൽപ്പന നടത്താൻ ബാംഗ്ലൂരിൽ നിന്നും 55 ഗ്രാമോളം എം ഡി എം എ കടത്തികൊണ്ടു വന്നതിന് പോലീസ് അറസ്റ്റ് ചെയ്ത രണ്ടു പേരെയും കോടതി റിമാണ്ടു ചെയ്തു. കൊട്ടിയംപറക്കുളം സ്വദേശി മൺസൂർ റഹിം, മങ്ങാട് മുന്തോളിമുക്ക്  നിഖിൽ സുരേഷ് എന്നിവരാണ് റിമാണ്ടിലായത്. കൂടുതൽ അന്വേഷണത്തിന് ഇരുവരെയും കസ്റ്റഡിയിൽ വാങ്ങാനാണ് പോലീസിൻ്റെ നീക്കം. പിടിച്ചെടുത്ത എം ഡി എം എ യുടെ സാംപിൾ കെമിക്കൽ സയൻസ് ലാബിൽ അയച്ച് പരിശോധന ഫലം ലഭിക്കേണ്ടതുണ്ട്. അറസ്റ്റിലായ മൻസൂർ പോത്ത് കച്ചവടത്തിനൊപ്പം രാസലഹരിയുടെ വിൽപ്പനക്കാരനാണന്നും പോലീസ് പറയുന്നു.എന്നാൽ ഇയാൾ ആദ്യമായാണ് ബാംഗ്ലൂരിൽ നിന്നും എം ഡി എം എ കടത്തികൊണ്ടു വന്നതെന്നാണ് വിവരം. പെൺസുഹൃത്തിൻ്റെ സഹായത്തോടെയാണ് നിഖിൽ ബാംഗ്ലൂരിൽ നിന്നും എം ഡി എം എ സംഘടിപ്പിച്ചു കടത്തികൊണ്ടു വന്നത്. ഇയാൾ രണ്ടാം പ്രാവശ്യമാണ് ബാംഗ്ലൂരിൽ നിന്നും എം ഡി എം എ കൊണ്ടുവന്നതെന്ന് കണ്ടെത്തി. ഇവരെപ്പോലെ നിരവധി സംഘങ്ങളുണ്ടെന്നാണ് വിവരം. പക്ഷേ ഇത്തരക്കാരെ മാസങ്ങളോളം നീണ്ട നിരീക്ഷണങ്ങൾക്കൊടുവിലെ പിടികൂടാനാകു.കൊട്ടിയത്ത് നിരവധി കേന്ദ്രങ്ങൾ അധികൃതരുടെ നിരീക്ഷണത്തിലാണ്