സ്കൂളുകളിൽ വീണ്ടും ഉച്ചഭക്ഷണ പ്രതിസന്ധി

സ്കൂളുകളിൽ വീണ്ടും 

ഉച്ചഭക്ഷണ പ്രതിസന്ധി

@ പച്ചക്കറികള്‍, പലവ്യഞ്ജനം, പയര്‍വര്‍ഗങ്ങള്‍, പാല്‍, മുട്ട എന്നിവയ്ക്ക് അഞ്ചുവര്‍ഷം മുമ്പുള്ളതിനേക്കാള്‍ വില വര്‍ധിച്ചിട്ടും വിദ്യാഭ്യാസവകുപ്പ് കണ്ടില്ലെന്ന് നടിക്കുകയാണ്.

കൊല്ലം:   സർക്കാരിന്റെ പദ്ധതികളെല്ലാം നടപ്പാക്കാൻ ബാധ്യതപ്പെട്ടവരാണ് വിദ്യാഭ്യാസവകുപ്പിന്റെ കീഴിലുള്ള പ്രഥമാധ്യാപകരടക്കമുള്ളവർ. എന്നാൽ, എപ്പോഴും സ്വന്തം കീശയിൽനിന്ന് പണം ചെലവഴിച്ച് ഉച്ചഭക്ഷണപദ്ധതി വിജയിപ്പിക്കേണ്ട അവസ്ഥയിലാണ് അധ്യാപകർ. സ്കൂളുകളിൽ ഉച്ചഭക്ഷണ പദ്ധതിയുമായി മുന്നോട്ടു പോകുമ്പോൾ പ്രഥമാധ്യാപകർ അനുഭവിക്കുന്ന പ്രയാസങ്ങൾ നിരവധിയാണ്. സ്വന്തം കീശയിൽ നിന്നും സഹപ്രവർത്തകരിൽ നിന്നും മറ്റുള്ളവരിൽ നിന്നുമെല്ലാം പണമടക്കം സമാഹരിച്ച് കാര്യക്ഷമമായി പദ്ധതി മുന്നോട്ടു കൊണ്ടു പോകാൻ പറ്റാത്ത അവസ്ഥയാണുള്ളത്.

1986ൽ തുടങ്ങിയ സ്കൂളുകളിലെ ഉച്ചക്കഞ്ഞി വിതരണം 2012 മുതലാണ് വിഭവസമൃദ്ധമായ ഉച്ചഭക്ഷണമാക്കി മാറ്റിയത്. 2012 മാർച്ച് വരെ സ്കൂളുകൾക്കാവശ്യമായ അരിയും പയറും സിവിൽ സപ്ലൈസ് മുഖേന നേരിട്ട് സ്കൂളുകൾക്ക് നല്കിയിരുന്നു.

പാചകക്കൂലിയും ആവശ്യത്തിനുള്ള പലവ്യഞ്ജനങ്ങളും മാത്രമായിരുന്നു സ്കൂൾ അധികൃതർക്ക് കണ്ടെത്തേണ്ടിയിരുന്നത്. എന്നാൽ, 2012- '13 മുതൽ സ്കൂളുകൾക്ക് അരി മാത്രമാക്കി. ഉച്ചഭക്ഷണ വിഭാഗത്തിനാവശ്യമായ മറ്റു സാമഗ്രികളെല്ലാം സ്കൂൾ അധികൃതർ കണ്ടെത്തണമെന്നായി.

കൂടാതെ ആഴ്ചയിൽ രണ്ടു ദിവസം പാലും ഒരുദിവസം മുട്ട/ പഴം എന്നിവ നല്കണമെന്നും നിർദേശം നല്കി. ഇതിനാവശ്യമായി പരിമിതമായ കണ്ടിൻജൻസി തുകയാണ് വിദ്യാഭ്യാസവകുപ്പ് അനുവദിച്ചത്. അഞ്ചു വർഷം മുമ്പ് അനുവദിച്ച അതേ നിരക്കിലുള്ള തുകയാണ് ഇന്നും സ്കൂൾ അധികൃതർക്ക് നല്കുന്നത്.

പച്ചക്കറികൾ, പലവ്യഞ്ജനം, പയർവർഗങ്ങൾ, പാൽ, മുട്ട എന്നിവയ്ക്ക്  അഞ്ചുവർഷം മുമ്പുള്ളതിനേക്കാൾ വില വർധിച്ചിട്ടും വിദ്യാഭ്യാസവകുപ്പ് കണ്ടില്ലെന്ന് നടിക്കുകയാണ്. സമൂഹത്തിന്റെ എല്ലാ തുറകളിലുംപെട്ട സാധാരണക്കാരുടെ മക്കളാണ് പൊതുവിദ്യാലയങ്ങളിൽ പഠിക്കുന്നവരിൽ ഭൂരിഭാഗവും.

അവർക്ക് കൃത്യമായി നല്ല രീതിയിൽ ഉച്ചഭക്ഷണം നല്കണമെന്നുള്ളത് സംസ്ഥാനത്തെ പൊതുവിദ്യാലയാധികൃതരുടെ ഏറ്റവും വലിയ ആഗ്രഹം കൂടിയാണ്. അതുമാത്രമാണ് എല്ലാം സഹിച്ച് ഉച്ചഭക്ഷണ പദ്ധതി മുന്നോട്ടു കൊണ്ടു പോകുന്ന പ്രധാന കാരണവും.

സ്കൂളുകളിലെ ഉച്ചഭക്ഷണ നടത്തിപ്പിന്റെ ചുമതല ഉച്ചഭക്ഷണക്കമ്മിറ്റിക്കാണ്. എന്നാൽ, മഹാഭൂരിഭാഗം വിദ്യാലയങ്ങളിലും ഇത് പേരിനു മാത്രമായി പ്രവർത്തിക്കുന്ന കമ്മിറ്റികളാണ്. മിക്ക വിദ്യാലയങ്ങളിലും എല്ലാ ചുമതലകളും ബാധ്യതകളും ഏകാംഗക്കമ്മിറ്റി തലവനായ പ്രഥമാധ്യാപകനു തന്നെ.

150 കുട്ടികൾ വരെയുള്ള വിദ്യാലയങ്ങളിൽ ഒരു കുട്ടിക്ക് അഞ്ചുരൂപയും അതിനുമുകളിൽ കുട്ടികളുള്ള വിദ്യാലയങ്ങളിൽ ആറുരൂപയുമാണ് സർക്കാർ നല്കുന്ന ഫണ്ട്. എന്നാൽ, ഇത് ഓരോമാസവും ചെലവഴിക്കുന്ന സംഖ്യയുടെ പകുതിയോളം പോലും ആകില്ലെന്നാണ് പ്രഥമാധ്യാപകർ പറയുന്നത്.

പ്രൈമറി സ്കൂളുകളിലെ പ്രഥമാധ്യാപകർ ക്ലാസ് ചുമതല കൂടി വഹിച്ച് ഔദ്യോഗിക ഓഫീസ് പ്രവർത്തനവും നടത്തി ജോലിഭാരത്താൽ വീർപ്പുമുട്ടുകയാണ്. അതിനിടയിലാണ് ഉച്ചഭക്ഷണത്തിന്റെ നടത്തിപ്പുചുമതലയും.

@ ഉച്ചഭക്ഷണനിരക്ക് വർധിപ്പിച്ച ഉത്തരവ് വിഴുങ്ങി

ഉച്ചഭക്ഷണ പദ്ധതിയുടെ ചെലവ്  പൊതുവിദ്യാഭ്യാസ വകുപ്പ് കണ്ടിൻജന്റ് നിരക്ക് ഒരു കുട്ടിക്ക് എട്ടു രൂപയാക്കി വർധിപ്പിച്ച് ഉത്തരവിറക്കിയിരുന്നു. 2016 മാർച്ച് മൂന്നിന് ഇറക്കിയ ഉത്തരവിന്മേൽ ഇനിയും ഒരു നടപടിയും വിദ്യാഭ്യാസ വകുപ്പ് കൈക്കൊണ്ടിട്ടില്ല. 150ൽ കൂടുതൽ കുട്ടികളുള്ള വിദ്യാലയങ്ങൾക്കാണ് വർധന ബാധകമാക്കിയിരുന്നത്. ഉച്ചഭക്ഷണത്തിനായി സർക്കാർ അരിയും പരിമിതമായ ഫണ്ടും നല്കി മാറിനില്ക്കരുത്. പോഷകസമൃദ്ധമായ നല്ല ഭക്ഷണം കുട്ടികൾക്ക് ലഭ്യമാക്കണം. അവർ ഉച്ചയ്ക്ക് പട്ടിണി കിടക്കരുത്. നല്ല ആഹാരശീലങ്ങൾ പാലിച്ച് ഭക്ഷണം കഴിക്കുന്നതിനുള്ള സാഹചര്യമൊരുക്കണം. ഇതിനായി സ്കൂളുകളിൽ പ്രത്യേക സംവിധാനമൊരുക്കണം, പഠിപ്പിക്കണം, പഠിപ്പിക്കുന്ന അധ്യാപകരെ മോണിറ്റർ ചെയ്യണം. അതിനിടയിൽ ഇന്റർനെറ്റിന്റെ മുന്നിലിരുന്ന് നിരവധി രേഖകൾ തയ്യാറാക്കണം. അവ മേൽ ഓഫീസുകളിൽ കൃത്യമായി എത്തിക്കണം. ഇതെല്ലാം ഇന്ന് കേരളത്തിലെ ഓരോ പ്രഥമാധ്യാപകന്റെയും ദൈനംദിന പ്രവർത്തനങ്ങളാണ്. അതിനിടയിൽ ഉച്ചഭക്ഷണത്തിന്റെ നടത്തിപ്പെങ്കിലും പ്രത്യേക സംവിധാനത്തിന്റെ കീഴിലാക്കിയാൽ പൊതുവിദ്യാഭ്യാസത്തിന് കരുത്തേറുമെന്നാണ് പ്രഥമാധ്യാപകരുടെ അഭിപ്രായം.

രുചി രജിസ്റ്റർ മുതൽ കാലിച്ചാക്ക് രജിസ്റ്റർ വരെ

സ്കൂൾ ഉച്ചഭക്ഷണ പദ്ധതി ബാധ്യത സഹിച്ച് മുന്നോട്ടു കൊണ്ടു പോകുമ്പോൾ തന്നെ പതിനെട്ടോളം രേഖകളും പ്രഥമാധ്യാപകൻ കൃത്യമായി സൂക്ഷിക്കണം. ഇതിൽ അവസാനം രംഗപ്രവേശം ചെയ്ത രേഖയാണ് 'രുചിരജിസ്റ്റർ'.ഇവ കൂടാതെ എല്ലാ ദിവസവും എഴുതി സൂക്ഷിക്കേണ്ട അഞ്ച് രജിസ്റ്ററുകളും മാസത്തിൽ സൂക്ഷിക്കേണ്ട 11 രജിസ്റ്ററുകളുമടക്കം 17 രേഖകൾ വേറെയുമുണ്ട്. ഉച്ചഭക്ഷണ മേൽനോട്ടത്തിനായി ഓരോ ഉപജില്ലയിലും പ്രത്യേകം ചുമതലപ്പെട്ട ഉദ്യോഗസ്ഥരുമുണ്ട്. സ്കൂളുകളിൽ ഇത്തരം ഉദ്യോഗസ്ഥർ പരിശോധനയ്ക്കെത്തുമ്പോൾ രേഖകൾ കൃത്യമായി സൂക്ഷിച്ചില്ലെങ്കിൽ അതിന്റെ പഴിയും പിഴയും പ്രഥമാധ്യാപകനുതന്നെ

@ കൂടുതൽ കുട്ടികളുള്ള സ്കൂളുകളിൽ ഗുണമേന്മയേറിയതും പോഷക സമൃദ്ധവുമായ ഉച്ചഭക്ഷണം ഒരാൾക്ക് എങ്ങനെ തയ്യാറാക്കാനാകുമെന്ന കാര്യത്തിൽ വിദ്യാഭ്യാസ വകുപ്പിന് മിണ്ടാട്ടമില്ലെന്നാണ് പാചകക്കാരുടെ സംഘടനകളും പറയുന്നത്. നിലവിൽ 501 കുട്ടിൾക്ക് മുകളിലുള്ള വിദ്യാലയങ്ങളിൽ മാത്രമാണ് രണ്ട് പാചകക്കാരെ നിയമിക്കാൻ അനുവാദമുള്ളത്. 500 വരെയുള്ള കുട്ടികൾക്ക് ഉച്ചഭക്ഷണം തയ്യാറാക്കുന്നതിന് രാവിലെ ഏഴു മുതൽ തുടങ്ങുന്ന പ്രവൃത്തി അവസാനിക്കുന്നത് വൈകുന്നേരം മൂന്നു മണിയോടെ മാത്രമാണ്. എന്നാൽ, ലഭിക്കുന്ന വേതനമാവട്ടെ പരമാവധി 400 രൂപയും. 

ഭക്ഷണം പാചകം ചെയ്തു കഴിഞ്ഞാൽ ഭക്ഷണ വിതരണത്തിനു മുമ്പ് അധ്യാപകരും ഒന്നിലധികം രക്ഷിതാക്കളോ സ്കൂൾ മാനേജ്മെന്റ് കമ്മിറ്റിയംഗങ്ങളോ വിഭവങ്ങൾ രുചിച്ചു നോക്കണമെന്നാണ് വ്യവസ്ഥ. കൂടാതെ അവരുടെ അഭിപ്രായങ്ങൾകൂടി 'രുചിരജിസ്റ്ററിൽ' രേഖപ്പെടുത്തിവെക്കണം. ഓരോ ദിവസവും മാറി മാറി അംഗങ്ങളെത്തി രുചിച്ച് നോക്കിമാത്രമേ ഉച്ചഭക്ഷണ വിതരണം നടത്താവൂവെന്നാണ് നിർദേശം.500 കുട്ടികൾവരെ പഠിക്കുന്ന സ്കൂളുകളിൽ ഒരു പാചകക്കാരിയെ മാത്രമാണ് വിദ്യാഭ്യാസവകുപ്പ് നിയമിച്ചിട്ടുള്ളത്. 200 കുട്ടികളുള്ള വിദ്യാലയങ്ങൾക്ക് ഒരാൾക്ക് ഞെരുങ്ങിയാണെങ്കിലും ഉച്ചഭക്ഷണം പാചകം ചെയ്യാമെന്നാണ് ദീർഘകാലമായി ഉച്ചഭക്ഷണം പാചകം ചെയ്യുന്നവർ തന്നെ പറയുന്നത്

100 കുട്ടികളുള്ള വിദ്യാലയം

(പാചകക്കൂലി പ്രത്യേകം നല്കും)

ഒരു മാസം 20 പ്രവൃത്തി ദിവസം കണക്കാക്കിയാൽ ഒരു കുട്ടിക്ക് പ്രതിദിനം അഞ്ചു രൂപ.

പ്രതിദിനം കിട്ടുന്ന തുക 100x5രൂപ = 500.

20 ദിവസത്തേക്ക് 20x500 രൂപ = 10,000.

ചെലവ് പാൽ ആഴ്ചയിൽ രണ്ടുദിവസം

100x150 മി.ലി = 15 ലിറ്റർ.

(ഒരുലിറ്റർ പാലിന് 40 രൂപ നിരക്കിൽ) = 600 രൂപ.

ഒരു മാസം എട്ടു ദിവസം 8x600= 4800

മുട്ട ആഴ്ചയിൽ ഒന്ന് മാസത്തിൽ 4 ദിവസം

(ഒരു മുട്ട 5 രൂപ) 400x5 രൂപ = 2000

പലവ്യഞ്ജനം + പച്ചക്കറി + പാചക എണ്ണ മുതലായവ

പ്രതിദിനം 400രൂപ. 20x400 = 8000

അരികൊണ്ട് വരുന്ന ചെലവ് + ഇന്ധനം = 2300

ആകെ = 17,100

ബാധ്യത (പ്രതിമാസം) = 7,100 രൂപ.

300 കുട്ടികളുള്ള വിദ്യാലയം

(പാചകക്കൂലിയടക്കം ഒരുകുട്ടിക്ക് ആറുരൂപ )

20 പ്രവൃത്തി ദിവസം = 300x6 രൂപ x 20 = 36000 രൂപ.

പാൽ എട്ട് ദിവസം 300x150 മി.ലി. = 45ലി.

45 ലിx 40 രൂപ x 8 = 14440 രൂപ.

മുട്ട 4 ദിവസം 5 രൂപ നിരക്കിൽ (300x5രൂപ x4) = 6000 രൂപ.

പച്ചക്കറി + പലവ്യഞ്ജനം + പാചകഎണ്ണ

(എറ്റവും ചുരുങ്ങിയത് പ്രതിദിനം 1000 രൂപ)

20x1000 = 20,000 രൂപ.

പാചകക്കൂലി സ്കൂൾ ഫണ്ടിൽനിന്നും

250 രൂപയും 150 രൂപ വിദ്യാഭ്യാസവകുപ്പ് നേരിട്ടും നല്കുന്നു

അതിന്റെ അടിസ്ഥാനത്തിൽ 20x250രൂപ = 5000 രൂപ.

ഇന്ധനം + വാഹന ചാർജ് തുടങ്ങിയവ

(ചുരുങ്ങിയ വില) = 3600 രൂപ.

ആകെ = 49,000 രൂപ.

ബാധ്യത പ്രതിമാസം = 13,000 രൂപ.