ക്രിസ്തുമസിനെയും പുതുവത്സരത്തെയും വരവേൽക്കാൻ നാടും നഗരവും അണിഞ്ഞൊരുങ്ങി

കൊല്ലം : ക്രിസ്തുമസിനെയും പുതുവത്സരത്തെയും വരവേൽക്കാൻ നാടും നഗരവും അണിഞ്ഞൊരുങ്ങി  ആഘോഷലഹരിയിലായി ജനങ്ങളെ  കാത്തിരിക്കുന്നത് ഇനി ആഘോഷങ്ങളുടെ ദിനങ്ങൾ. കടകളിൽ  ക്രിസ്‌മസിനോടനുബന്ധിച്ച ഉൽപ്പന്നങ്ങളാൽ നിറഞ്ഞു.  വർണനക്ഷത്രങ്ങളും പുൽക്കൂടുകളും മഞ്ഞുപെയ്യുന്ന ക്രിസ്‌മസ് ട്രീയും നിറഞ്ഞതോടെ നാടിന് ഉത്സവാന്തരീക്ഷം ലഭിച്ചു. പച്ചക്കറി പലചരക്ക് വിപണിയിൽ വില കൂടുന്നതല്ലാതെ കുറയുന്നില്ല എന്നാണ് ജനങ്ങളുടെ പരാതി.സർക്കാർ സംവിധാനങ്ങളിൽ പ്രവർത്തിക്കുന്ന  ക്രിസ്തുമസ് ചന്തകളും വഴിപാടായി മാറി. വിപണിയിൽ വില ഉയർന്നതോടെ 

നിലവാരം കുറഞ്ഞ ഭക്ഷ്യസാധനങ്ങളുടെ വിപണനവും വർദ്ധിച്ചു. അവ നിയന്ത്രിക്കാൻ നടപടി വേണമെന്ന ആവശ്യം ശക്തമായി. വിവിധ രൂപങ്ങളിലും നിറങ്ങളിലുമായി 

കേക്കുകൾ വറ്റലുകൾ,പലഹാരങ്ങൾ, മിക്സ്‌ചറുകൾ എന്നിവ ഇപ്പോൾ വിപണികളിൽ എത്തിക്കൊണ്ടിരിക്കുന്നു. ഇവയിൽ പകുതിയിലേറെ മറ്റ് സംസ്ഥാനങ്ങളിൽ നിന്ന് എത്തിക്കുന്നവയും ബാക്കിയുള്ളവ അന്യസംസ്ഥാന തൊഴിലാളികളെ ഉപയോഗപ്പെടുത്തി അവിടെ തയ്യാറാക്കുന്നവയുമാണ്. എന്നാൽ പുറത്തു നിന്നെത്തിക്കുന്ന ഭക്ഷ്യസാധനങ്ങളുടെ ഗുണനിലവാരം ഉറപ്പുവരുത്തുന്നതിനോ, തദ്ദേശീയമായി പ്രവർത്തിക്കുന്ന അനധികൃത ഭക്ഷ്യോത്പാദക വിതരണ സ്ഥാപനങ്ങളെ നിയന്ത്രിക്കുവാനോ കാര്യക്ഷമമായ യാതൊരു നടപടികളും സ്വീകരിക്കാത്ത അവസ്ഥയാണ് നിലവിലുള്ളത്.

@ നക്ഷത്രങ്ങൾ തന്നെയാണ് ഇക്കുറിയും വിപണിയിലെ താരം

പതിവുപോലെ നക്ഷത്രങ്ങൾ തന്നെയാണ് ഇക്കുറിയും വിപണിയിലെ താരം. പേപ്പർ നക്ഷത്രങ്ങളെ വിപണിയിലെ ന്യൂജെൻ ഫൈബർ നിയോൺ നക്ഷത്രങ്ങളും 6 പ്ലസ് 6 നക്ഷത്രമാലയും ഇക്കുറി മറികടക്കുമെന്ന പ്രതീക്ഷയിലാണ് വ്യാപാരികൾ, മിന്നിമിന്നി കത്തുന്ന ആറ് വലിയ നക്ഷത്രവും ആറ് ചെറിയ നക്ഷത്രവും ഉൾപ്പെടുന്ന മാലയാണ് 6+6 സ്റ്റാർ. പേപ്പർ നക്ഷത്രങ്ങൾ 50 രൂപയിൽ തുടങ്ങുമ്പോൾ ഒരടിയോളം വലിപ്പമുള്ള പ്ലാസ്റ്റിക് നക്ഷത്രത്തിന് 400 രൂപയോളം വിലവരും. എൽഇഡി നക്ഷത്രങ്ങൾ 200ൽ തുടങ്ങും. ഫൈബറിൽ നിർമിച്ച നിയോൺ സ്റ്റാറുകൾക്ക് വലിപ്പമനുസരിച്ചാണ് വില. പുൽക്കൂട് വിപണിയിലും ഫൈബർ സാന്നിധ്യമറിയിച്ചു കഴിഞ്ഞു. പുൽക്കൂട് അലങ്കാരവും രൂപങ്ങളും കൂടിയാകുമ്പോൾ വിലയൽപ്പം കൂടുമെന്ന് മാത്രം. ഫൈബറിൽ നിർമിച്ച 10 സെൻ്റിമീറ്റർ വലിപ്പമുള്ള പുൽക്കൂട് സെറ്റിന് 2000ന് അടുത്ത് വിലവരും. വിപണിയിൽ നിലവിലുള്ള പ്ലാസ്റ്റർ ഓഫ് പാരീസ് സെറ്റുമുണ്ട്. മഞ്ഞുപോലെ വെള്ളം ചീറ്റുന്ന മിസ്റ്റ് ട്രീയാണ് ക്രിസ്‌മസ് ട്രീ വിപണിയിലെ ന്യൂജെൻതാരം. വില 10,000 കടക്കും. സാന്താക്ലോസ് വസ്ത്രങ്ങൾക്ക് പുറമേ ചുവപ്പും വെള്ളയും നിറങ്ങളിലുള്ള കുട്ടികളുടെയും മുതിർന്നവരുടെയും വസ്ത്രങ്ങളും വിപണിയിൽ ഇടംനേടിയിട്ടുണ്ട്.

@ ക്രിസ്തുമസിന് കേക്ക് വില ഉയർന്നു.

ക്രിസ്തുമസിന് ദിവസങ്ങൾ മാത്രം ശേഷിക്കേ ജില്ലയിൽ കേക്ക് വിപണി സജീവമായി  ഒപ്പം മുൻവർഷത്തേക്കാൾ വിലയും ഉയർന്നു തന്നെ.

ക്രീം കേക്കുകൾക്കാണ് എപ്പോഴും ഡിമാൻ്റെങ്കിലും പ്ലം കേക്കുകളാണ് ക്രിസ്മസ് വിപണിയിലെ താരം. ഷുഗർ ഫ്രീ എഗ്ലെസ് പ്ലം കേക്ക്, റിച്ച് പ്ലം കേക്ക്, ജ്യൂസി പ്ലം കേക്ക്, പ്ലം ക്യാരറ്റ് പുഡിംഗ് കേക്ക് തുടങ്ങി പലതരത്തിലുള പ്ലം കേക്കുകൾ വിപണി കൈയ്യടക്കിയിട്ടുണ്ട്. ഓർഡറുകൾ അനുസരിച്ച് ആവശ്യപ്പെടുന്ന ഡിസൈനിൽ കേക്കുകൾ തയ്യാറാക്കുന്ന കടകളും സജീവമാണ്.പ്ലം കേക്കുകൾക്ക് പുറമെ, റെഡ് വെൽവെറ്റ്, റെയിൻബോ കേക്ക്, മിൽക്കി ട്രഫിൾ, സെനോറ ബബിൾ, റാസ്‌മലായ്, ഡെവിൾസ് ചോക്ലേറ്റ്, ഡെവിൾസ് ഇൻഫ്യൂഷൻ തുടങ്ങി നിരവധി ക്രീം കേക്കുകളും വിപണിയിലുണ്ട്. കൂടാതെ, ഹോം മെയ്‌ഡ്‌ കേക്കുകൾക്കും ആവശ്യക്കാരേറെയാണ്. ചില കേക്ക് കടകളിൽ ചോക്ലേറ്റും കേക്കുകളും അടങ്ങുന്ന ഗിഫ്റ്റ് പാക്കുകൾ അളവിനനസരിച്ച് പല വിലകളിൽ ലഭ്യമാണ്. @   വൈൻ, ചോക്ലേറ്റ് എന്നിവയടങ്ങിയ ക്രിസ്‌മസ് -ന്യൂ ഇയർ സമ്മാനങ്ങളും ലഭ്യമാണ്. വിവിധ കേക്ക് ബ്രാൻഡുകൾ സിഗ്നേച്ചർ ഐറ്റം എന്ന നിലയിലും പ്ലം കേക്ക് വിപണിയിലിറക്കിയിട്ടുണ്ട്. കേക്ക്, ഈത്തപ്പഴം, ചോക്ലേറ്റ്, വാഴപ്പഴം, പൈനാപ്പിൾ തുടങ്ങി വിവിധ രുചികളിലുള്ളതാണ് പ്ലം കേക്കുകൾ. 100 രൂപ മുതൽ 1000 രൂപ വരെയാണ് വില. ക്ലാസിക്ക് പ്ലം, റിച്ച് പ്ലം, ചോക്ലേറ്റ് പ്ലം, സ്പൈസ്‌ഡ് ആൽമണ്ട്, ഫ്രൂട്ട് ആൻഡ് നട്ട് റം, സോക്ക്‌ഡ് ലെമൻ പ്ലം, കാരറ്റ് പ്ലം, ബനാന പ്ലം തുടങ്ങിയവയ്ക്കാണ് വിപണിയിൽ ഇഷ്‌ടക്കാർ ഏറെ. 

സ്കൂ‌ളിലെയും കോളേജിലേയും ക്രിസ്മസ് ആഘോഷങ്ങൾക്ക് പ്രതേക പാക്കേജ് ലഭ്യമാണ്. പ്ലം കേക്കുകൾക്കൊപ്പം തന്നെ ക്രീം കേക്കുകൾക്കും നിരവധി ആവശ്യക്കാരെത്തുന്നുണ്ട്. ഗിഫ്റ്റ് കൊടുക്കാനാണ് പലരും പ്ലം കേക്ക് വാങ്ങുന്നത്.

പ്ലം കേക്ക് - 650 -1000

ഷുഗർ ഫ്രീ ഐസ് പ്ലം കേക്ക് 1000-1200

ജ്യൂസി പ്ലം കേക്ക്- 550

പ്ലം ക്യാരറ്റ് പുഡിംങ് കേക്ക് - 650

റിച്ച് പ്ലം കേക്ക് - 675

റെഡ് വെൽവെറ്റ് - 850

റെയിൻബോ കേക്ക് - 950

മിൽക്കി ട്രഫിൾ - 550

കാരമൽ ചോക്ലേറ്റ് - 900

സെനോറ ബബിൾ - 700

ഗുലാബ് ജാമൂൻ കേക്ക്. 1,200

ചോക്ലേറ്റ് ഗ്രാന്റ്മാ- 1,350

ഹണി ആൽമണ്ട്. 1,200

റാസ്മലായ് - 1,300

ഓറിയോ കാൻഡി- 1,100

ഡെവിൾസ് ചോക്ലേറ്റ് - 999

ഡെവിൾസ് ഇൻഫ്യൂഷൻ - 1,100

മോക്കാ ഹേസൽനട്ട് - 999

ലോട്ടസ് ബിസ്കഫ്-1,200

ഓറിയോ കേക്ക് - 950

ഫിഗ് ആന്റ് ഹണി കേക്ക് - 1,100

@ വസ്ത്ര വിപണിയും പിന്നിലല്ല, തുണിക്കടകളിൽ കഴിഞ്ഞ ക്രിസ്തുമ

സിനേക്കാൾ തിരക്കാണ്.  ആഘോഷമാക്കാൻ ഒരുങ്ങുകയാണ് കോളേജ് വിദ്യാർത്ഥികളും സ്കൂളുകളുമൊക്കെ. അതുകൊണ്ടു തന്നെ ചുവപ്പും വെളുപ്പും നിറമുള്ള കുർത്തി, കുർത്ത, ചുരിദാർ, ഫ്രോക്കുകൾ എന്നിവയ്ക്ക് വൻ ഡിമാൻഡ് ആണ്. ചുവപ്പിൽ വെള്ളപ്പുള്ളിയുള്ള ഷർട്ടുകളാണ് പുരുഷന്മാരുടെ വസ്ത്രങ്ങളിലെ താരം. സന്താക്ലോസ് വേഷത്തിനും ഡിമാൻഡുണ്ട്. തെരുവിലും കടകളിലുമെല്ലാം സാന്താക്ലോസ് വേഷം കിട്ടാനുണ്ട്. 260 രൂപ മുതൽ 1200 രൂപ വരെ വിലയുള്ള സാന്താക്ലോസ് വേഷങ്ങളാണ് ഉള്ളത്. മറ്റൊന്ന് മുഖം മൂടികളും തൊപ്പികളുമാണ്. 100 മുതൽ 260 രൂപ വരെയാണ് മുഖം മൂടിയുടെ വില. എൽ ഇ ഡി ലൈറ്റ് പിടിപ്പിച്ച ക്രിസ്മസ് തൊപ്പികൾ വരെയുണ്ട്.

@ഗൃഹോപകരണ സ്ഥാപനങ്ങളും ക്രിസ്മസ്, ന്യൂഇയർ ഓഫറുകളുമായി വിപണി ഉഷാറാക്കുകയാണ്. അമ്പതിനായിരം രൂപയ്ക്ക് ഒരു വീട്ടിലേയ്ക്കുള്ള മുഴുവൻ സാധനങ്ങളും നൽകുന്ന പാക്കേജ് വരെ ഇത്തവണ ഒരുക്കിയിട്ടുണ്ട്. ഈ പാക്കേജിന് ആവശ്യക്കാർ ഏറെയാണ്. എ.സിയും ടി.വിയും വാഷിംഗ് മെഷീനുമൊക്കെയാണ് ഓഫറിൽ വാങ്ങുന്നതിൽ മുന്നിൽ. ക്രിസ്തുമസ് 

അടുത്തതോടെ തിരക്ക് കൂടിയിട്ടുണ്ടെന്ന് വ്യാപാരികൾ പറയുന്നു.

 .