ബസിൽ തിക്കും തിരക്കും ഞെങ്ങി ഞെരുങ്ങി വിദ്യാർഥികളുടെ യാത്ര

കൊല്ലം: 48 സീറ്റുള്ള സ്വകാര്യ ബസ്. 11 സ്റ്റാന്റിങ്ങടക്കം 60 പേരെ കയറ്റേണ്ടുന്ന വാഹനത്തിൽ അതിലിരട്ടി യാത്രക്കാർ. ഏറെയും വിദ്യാർഥികൾ. കെ എസ്‌ ആർ ടി സി യിൽകൂടി യാത്രാസൗജന്യം ഇല്ലാത്തതിനാൽ ആ തിരക്ക് മുഴുവൻ സ്വകാര്യ ബസിലേക്കായി.

അത് കൊണ്ട് തന്നെ 

വിദ്യാലയങ്ങളിലേക്കുള്ള വിദ്യാർഥികളുടെ വരവും പോക്കും അതികഠിനമായി. അത്രയ്ക്ക് തിക്കും തിരക്കുമാണ് ബസിൽ. പൂർണ്ണതോതിൽ 

ക്ലാസുകൾ ആരംഭിച്ചു കൂടുതൽ 

വിദ്യാർഥികൾകൂടി വിദ്യാലയത്തിലേക്ക് എത്തിയതോടെ ബസിനുള്ളിൽ കോവിഡിനെ മറന്ന യാത്രയാണ്. കുട്ടികളെ എങ്ങനെ കയറ്റും എന്ന ചോദ്യവുമായി ബസുകാരും വാതിൽക്കൽ നിൽപ്പുണ്ട്.

അതിനിടയിലൂടെ വിദ്യാർഥിപാസ് ഇല്ലാതെ കെ എസ് ആർ ടി സി യും ഓടുന്നു. സ്കൂൾ തുറന്നിട്ടും കെ എസ്‌ ആർ ടി സി -പ്രൈവറ്റ് ബസുകളുടെ കുറവ് വിദ്യാർഥികളെ വളരെയധികം ബാധിക്കുന്നു. കോവിഡിന് മുൻപ്‌ ജില്ലയിൽ ഓടിയിരുന്നത് 1500ഓളം സ്വകാര്യ ബസുകളാണ്. കോവിഡ് പ്രതിസന്ധിക്കുശേഷം 600-700 ബസുകൾ മാത്രമാണ് നിരത്തിലുള്ളത്. അഞ്ഞൂറിലധികം ബസുകളുടെ കുറവ് ആണ് ഇപ്പോൾ ഉള്ളത്. ഇത് ജനങ്ങളുടെ യാത്രയെ  ബാധിക്കുന്നു. സ്കൂൾ ബസുകളിൽ പലതും ഫിറ്റ്‌നസില്ലാത്ത കാരണത്താൽ ഓടിക്കുന്നില്ല. ജില്ലയിൽ നിലവിൽ 60 സ്കൂൾ ബസുകൾക്ക് മാത്രമാണ് ഫിറ്റ്‌നസ് നൽകിയതെന്ന് ആർ ടി ഒ ഓഫീസ് അധികൃതർ അറിയിച്ചു. ജില്ലയിൽ ചുരുക്കം ചില സ്കൂളുകൾ മാത്രമാണ് കെ എസ് ആർ ടി സി ബോണ്ട് സർവീസ് തുടങ്ങിയത്. ഇതും വിദ്യാർഥികളെ പ്രതിസന്ധിയിലാക്കുന്നു

സ്വകാര്യ ബസുകളിൽ ഒരുരൂപ പാസുമായി വിദ്യാർത്ഥികൾ പോകുമ്പോഴുള്ള പ്രശ്നങ്ങൾ ഇപ്പോഴെ തുടങ്ങി കഴിഞ്ഞു.സാമ്പത്തികപ്രശ്‌നം കാരണം നിർത്തിയിട്ട ബസുകളിൽ ഭൂരിഭാഗവും ഓടി തുടങ്ങിയിട്ടില്ല.നിരവധി ബസുകൾ ഇപ്പോഴും കട്ടപ്പുറത്താണ് നൂറോളം ബസുകൾ ജില്ലയുടെ പല ഭാഗങ്ങളിലായി തുരുമ്പിച്ച് കിടക്കുന്നുണ്ട്. പലതും ആക്രിവിലയ്ക്ക് വിറ്റു. ഗ്രാമീണമേഖലയിലെ ബസുകളാണ് ഏറെ തകർന്നുപോയതെന്ന് ഉടമകൾ പറയുന്നു.

@ഗ്രാമീണ മേഖലയിൽ വിദ്യാർത്ഥികളുടെ ബസ് യാത്ര സാഹസികം

ജില്ലയിൽ ട്രാൻസ്പോർട്ട് ബസ് സർവീസുകൾ പകുതിയോളം വെട്ടികുറച്ചതും സ്വകാര്യ ബസുകൾ നാലിലൊന്നായി ചുരുങ്ങിയതും രാവിലെയും വൈകുന്നേരവും യാത്രക്കാരുടെ ദുരിതം ഇരട്ടിയാക്കി. മിക്ക സ്കൂളുകളും സ്വന്തം വാഹനങ്ങൾ സർവീസ് ആരംഭിക്കാത്തത് കാരണം പെൺകുട്ടികളുൾപ്പെടെയുള്ളവർ സ്വകാര്യ ബസുകളിലും മറ്റുമാണ് സ്കൂളുകളിലെത്തുന്നത്.

@ ആവശ്യത്തിന് ബസും ജീവനക്കാരുമുണ്ട് എന്നിട്ടും കെ എസ് ആർ ടി സി ക്ക് ഓടാൻ വയ്യ.

അടച്ചിടലിനുശേഷം കെ എസ് ആർ ടി സി ഡിപ്പോകളുടെ അവസ്ഥയിതാണ്.

കൊവിഡിന്റെ മറവിൽ കെ എസ് ആർ ടി സി  20 മുതൽ 30 ശതമാനംവരെ സർവീസുകൾ വെട്ടിക്കുറച്ചതോടെ സ്റ്റോപ്പുകളിൽ കാത്തുനിന്ന് വലഞ്ഞ് യാത്രക്കാർ. കോവിഡിനുശേഷം ജില്ലയിൽ 150 ലേറെ ഷെഡ്യൂളുകൾ നിർത്തി.കിലോമീറ്ററിന് മിനിമം 30 രൂപയെങ്കിലും കിട്ടാത്ത സർവീസ് അവസാനിപ്പിക്കണമെന്ന മാനേജിങ് ഡയറക്ടറുടെ ഉത്തരവ് ഉദ്യോഗസ്ഥർ ദുരുപയോഗം ചെയ്യുകയാണെന്ന് യാത്രക്കാർ ആരോപിക്കുന്നു.

അടച്ചിടൽ സമയത്ത് 

ഡി സി പി (ഡിസ്ട്രിക്ട് കോമൺ പൂൾ) എന്ന ഓമനപ്പേരിൽ  ബസുകൾ വിവിധ കെ എസ് ആർ ടി സി ഡിപ്പോകളിലായി മാറ്റിയിട്ടിട്ടുണ്ട്. ഇവ ദിനംപ്രതി സ്റ്റാർട്ട് ചെയ്ത് പരിപാലിക്കുന്നതിനുമാത്രം ലക്ഷങ്ങളാണ് ചെലവാക്കുന്നത്. മാസങ്ങളായി ഓടിക്കാത്തതിനാൽ സൂപ്പർ ഡീലക്സ് ബസുകളടക്കം നശിക്കുകയാണ്.

രാവിലെ എട്ടിനും ഒൻപതിനും ഇടയിൽ ദേശീയപാതയിൽ കൊല്ലം - തിരുവനന്തപുരം റൂട്ടിൽ കൊട്ടിയം, പാരിപ്പള്ളി, ചാത്തന്നൂർ എന്നിവിടങ്ങളിൽ വിദ്യാർത്ഥികൾ അടക്കം 

ഒട്ടേറെപ്പേരാണ് ബസ് കാത്തുനിൽക്കുന്നത്. കൊല്ലം-പുനലൂർ, കൊല്ലം - പത്തനംതിട്ട റൂട്ടുകളിലും ഇതുതന്നെയാണ് സ്ഥിതി.

കൊല്ലം ഡിപ്പോയിൽ കോവിഡിനുമുൻപ്‌ 102 ഷെഡ്യൂളുകളുണ്ടായിരുന്നത് ഇപ്പോൾ 61 ആയി ചുരുങ്ങി. ഒന്നര ഡ്യൂട്ടിയാക്കുകയും ട്രിപ്പുകൾ കുറയ്ക്കുകയും ചെയ്തതിനാൽ ചെയിൻ സർവീസുകളും നിർത്തി. കൊല്ലം-പത്തനംതിട്ട റൂട്ടിൽ 20 മിനിറ്റ് ഇടവിട്ടുണ്ടായിരുന്ന സർവീസുകൾക്കായി ഇപ്പോൾ പലപ്പോഴും ഇരട്ടിയിലധികം സമയം കാത്തുനിൽക്കേണ്ടിവരുന്നു.

 നേരത്തേ രാത്രി 8.35 വരെ സർവീസുണ്ടായിരുന്നു. ഇപ്പോൾ വൈകുന്നേരം 6മണിക്ക് അവസാന സർവീസ്പൂർത്തിയാക്കുന്നു.കൊട്ടാരക്കര ഡിപ്പോയിൽ നേരത്തേ 104 ബസുകൾ സർവീസ് നടത്തിയിരുന്നു. ശരാശരി 87 എണ്ണമേ ഇപ്പോൾ ഓടുന്നുള്ളൂ. 12 മണിക്കൂറായി ഡ്യൂട്ടി നിജപ്പെടുത്തിയതുമൂലം വൈകീട്ട് 6.30-ന് ശേഷമുള്ള സർവീസുകൾ മുടങ്ങി.

കരുനാഗപ്പള്ളിയിൽ 78 ഷെഡ്യൂളുകൾ 51 ആയി കുറഞ്ഞു. ഇവിടെ പതാരം, കാട്ടിൽക്കടവ്, ആനയടി, തുറയിൽക്കടവ്, വള്ളിക്കാവ് ഭാഗങ്ങളിൽ രൂക്ഷമായ യാത്രാക്ലേശമുണ്ട്. ചാത്തന്നൂർ ഡിപ്പോയിൽ കോവിഡിനുമുൻപ്‌ 45 ഷെഡ്യൂളുകൾ ഉണ്ടായിരുന്നത് 35 ആയി കുറച്ചു. ഇതോടെ കൊല്ലം-ആറ്റിങ്ങൽ ചെയിൻ സർവീസ് വലിയ പ്രതിസന്ധിയിലാണ്.പുനലൂരിൽ 63 സർവീസുകൾ 38 ആയി കുറച്ചു. 12 മണിക്കൂർ ഡ്യൂട്ടി നിജപ്പെടുത്തിയത്, ഇവിടെയും രാത്രി ഏഴരയ്ക്കുശേഷമുള്ള സർവീസുകളെ ബാധിച്ചിട്ടുണ്ട്. കുളത്തൂപ്പുഴയിൽ 10 ഷെഡ്യൂളുകൾ കുറച്ചു.കൊല്ലം - കുളത്തുപ്പുഴ ചെയിൻ സർവീസിനെ ഇത് കാര്യമായി ബാധിച്ചു. 84 ട്രിപ്പ് ഉണ്ടായിരുന്നത് 52 ആയി കുറഞ്ഞു.ആര്യങ്കാവിൽ 19 സർവീസുകൾ ഒൻപതായി ചുരുങ്ങി.ആറ്‌് ഫാസ്റ്റ് പാസഞ്ചർ സർവീസ് ഉണ്ടായിരുന്നത് ഒന്നുമാത്രമായി. പത്തനാപുരത്ത് 40 സർവീസുകൾ 27 ആയി ചുരുങ്ങി. പുന്നല, കൊട്ടാരക്കര, ഏനാത്ത് റൂട്ടിൽ യാത്രാക്ലേശം രൂക്ഷമാണിപ്പോൾ

പടം: എടക്കാട് ബസാർ സ്റ്റോപ്പിൽ തിങ്കളാഴ്ച രാവിലെ നിറയെ യാത്രക്കാരുമായെത്തിയ ബസിൽ കയറാനുള്ള യാത്രക്കാരുടെ ശ്രമം