കൊല്ലം : കൊല്ലം നഗരത്തില്‍ അംഗീകൃത ഓട്ടോറിക്ഷാ സ്‌റ്റാന്‍ഡുകളെക്കാള്‍ കൂടുതല്‍ സമാന്തര സ്‌റ്റാന്‍ഡുകളാണെന്ന പരാതി ഉയരുന്നു. ഇതിനെതിരെ പ്രതികരിക്കാന്‍ പക്ഷേ അംഗീകൃത സ്‌റ്റാന്‍ഡുകളിലെ ഡ്രൈവര്‍മാര്‍ക്കു പോലും പേടിയാണ്‌.
കാരണം സ്‌റ്റാന്‍ഡില്‍ കിടക്കാതെ വെറുതേ ഓട്ടോറിക്ഷയുമായി നഗരത്തില്‍ കറങ്ങിനടക്കുന്നത്‌ എണ്ണം പറഞ്ഞ ക്രിമിനലുകളും നിരോധിച്ച തീവ്രവാദി സംഘടനകളുടെ പ്രവർത്തകരുമാണ്. ട്രാഫിക്ക്‌ നിയമങ്ങള്‍ കാറ്റിൽ പറത്തിയാണ് ഇവരുടെ സഞ്ചാരം.കാലാ കാലങ്ങളായി നഗരത്തിന്‌ ഏറെ ശല്യം
സമാന്തര ഓട്ടോ സ്‌റ്റാന്‍ഡുകളാണ്‌. റെയില്‍വേ സ്‌റ്റേഷനു മുന്നിലും കെ എസ് ആര്‍ ടി സി സ്‌റ്റാന്‍ഡിനു മുന്നിലുമുള്ള സമാന്തര സ്‌റ്റാന്‍ഡുകളാണ്‌ നഗരത്തിലേക്ക്‌ എത്തുന്ന യാത്രക്കാരെയും മറ്റു വാഹനങ്ങളെയും കാല്‍നടക്കാരെയുമൊക്കെ ഏറെ ബുദ്ധിമുട്ടിക്കുന്നത്‌. ഓട്ടം വിളിച്ചാല്‍ പോകാതെ യാത്രക്കാരെ ബുദ്ധിമുട്ടിച്ചു
വെറുതേ ഗതാഗതക്കുരുക്ക്‌ ഉണ്ടാക്കി നഗരത്തിലൂടെ കറങ്ങുകയാണ്‌ ഇവരുടെ പണി. ഇനി തങ്ങള്‍ക്ക്‌ 'ഇഷ്‌ടപ്പെട്ടവരെ' കയറ്റിയാല്‍ തന്നെ അവരെയും കറക്കുകയാകും ഇവരുടെ ലക്ഷ്യം. ട്രയിനുകളിലും കെ എസ് ആര്‍ ടി സി ബസുകളിലും നഗരത്തിലേക്ക്‌ എത്തുന്നവരെ പിടികൂടാനാണ്‌ സമാന്തര സ്‌റ്റാന്‍ഡുകളിലെ ഡ്രൈവര്‍മാര്‍ ഗതാഗതം തടസപ്പെടുത്തി ഇവിടെ കറങ്ങുന്നത്‌.
@ റെയിൽവേ സ്റ്റേഷനിൽ പ്രീപെയ്‌ഡ് സ്റ്റാന്റ് പ്രവർത്തിക്കുന്നില്ല
പ്രീപെയ്‌ഡ് സ്റ്റാന്റ് പ്രവർത്തിക്കാത്തത് മൂലം കൊല്ലം റെയില്‍വേ സ്‌റ്റേഷനിലേക്ക്‌ ഓരോ ട്രെയിനുകളെത്തുമ്പോഴും എവിടെ നിന്നാണെന്നറിയില്ല ഓട്ടോറിക്ഷകള്‍ സ്‌റ്റേഷനു മുന്നില്‍ എത്തും. റെയിൽവേ സ്റ്റേഷൻ സ്റ്റാന്റിൽ
ആവശ്യത്തിന് ഓട്ടോറിക്ഷകള്‍ കാണാറുമില്ല. ഇവിടെ ഡ്യൂട്ടി നോക്കുന്ന ട്രാഫിക്ക്‌ പോലീസുകാര്‍ തന്നെയാണ് സമാന്തര സ്‌റ്റാന്‍ഡുകളെ നിയന്ത്രിക്കുന്നത്‌. യാത്രക്കാര്‍ക്ക്‌ തടസമുണ്ടാക്കി കറങ്ങുന്ന ഓട്ടോറിക്ഷകള്‍ക്കെതിരെ നടപടി എടുക്കുന്നില്ലെന്ന്‌ മാത്രമല്ല, ഇവരെ സഹായിക്കുന്ന നിലപാടാണ്‌ പോലീസുകാരുടേത്‌. സമാന്തര സ്‌റ്റാന്‍ഡുകളിലെ ഡ്രൈവര്‍മാര്‍ കാണേണ്ടതുപോലെ ഇവരെ കാണുന്നതിനുള്ള 'ഉദ്ദിഷ്‌ടക്കാര്യത്തിന്റെ ഉപകാരസ്‌മരണ' ആണിത്‌.
രാത്രി കാലങ്ങളില്‍ ട്രയിനുകളിലും ബസുകളിലും വന്നിറങ്ങുന്ന സ്‌ത്രീകള്‍ ഉള്‍പ്പെടെയുള്ള യാത്രക്കാര്‍ വീടണയാന്‍ ഓട്ടോറിക്ഷക്കാര്‍ക്ക്‌ പിന്നാലെ പാഞ്ഞിട്ടും ഇതൊന്നും പോലിസ് കാണാറില്ല. നഗരത്തിൽ കറങ്ങി നടക്കുന്ന നൂറ്‌ കണക്കിന്
ഓട്ടോറിക്ഷകൾ കൊല്ലം നഗരത്തിൽ കൂടുതൽ ഉണ്ടെങ്കിലും പക്ഷേ ഓട്ടം പോകാന്‍ വിളിച്ചാല്‍ ഇവരില്‍ പലരും വരില്ലെന്നു മാത്രം. സവാരിക്കല്ലാതെ ചുമ്മാ നഗരത്തിലൂടെ ഗതാഗതം തടസപ്പെടുത്തി കറങ്ങി നടക്കാന്‍ മാത്രം എത്തുന്നൊരു കൂട്ടം ഡ്രൈവര്‍മാരുണ്ട്‌. ഇവരാണ്‌ പ്രശ്‌നക്കാര്‍,
കുടുംബം പോറ്റാന്‍ നഗരത്തില്‍ ഓട്ടോറിക്ഷാ ഓടിക്കുന്ന ഡ്രൈവര്‍മാരുടെ പേരുകൂടി കളയുന്ന ഇത്തരക്കാര്‍ക്കെതിരെ നടപടിയെടുക്കാന്‍ നഗരത്തിലെ ട്രാഫിക്ക്‌ പോലീസുകാര്‍ ശ്രമിക്കാറില്ല ഓട്ടോ ഡ്രൈവര്‍മാരുടെ വേഷത്തില്‍ ഓട്ടോറിക്ഷയിൽ
കറങ്ങി നടക്കുന്ന ക്രിമിനലുകളാണ് ഇവർ.
@ കൊല്ലം നഗരത്തില്‍ അനധികൃതമായി കറങ്ങി നടക്കുന്ന ഓട്ടോറിക്ഷകളെ നിയന്ത്രിക്കാന്‍ തയ്യാറാകാത്ത പോലീസ്, ഗതാഗത വകുപ്പ് അധികൃതരുടെ നടപടിക്കെതിരെ വ്യാപക പ്രതിഷേധം ഉയരാന്‍ തുടങ്ങിയിട്ട്‌ കാലം കുറെയായി. ഇവരെ കണ്ടില്ലെന്നു നടിച്ചിട്ട്‌ യൂണിയൻ അംഗത്വം ഉള്ള ഉപജീവനത്തിനായി
ഓട്ടോറിക്ഷാ ഓടിക്കുന്ന ഡ്രൈവര്‍മാരെ ദ്രോഹിക്കാന്‍ മത്സരിക്കുകയാണ്‌ നഗരത്തിലെ ചില പോലീസുകാരെന്ന്‌ ഓട്ടോറിക്ഷാ ഡ്രൈവര്‍മാര്‍ തന്നെ കുറ്റപ്പെടുത്തുന്നു. ഓട്ടോറിക്ഷകളുമായി തോന്നും പടി കറങ്ങി നടക്കുന്ന ചില ഡ്രൈവര്‍മാര്‍ സ്‌ത്രീകളോടും വിദ്യാര്‍ത്ഥിനികളോടും മോശമായി പെരുമാറുന്നതായി നിരവധി പരാതികളാണ് പോലീസിൽ ചെല്ലുന്നത്.
ക്രിമിനല്‍ സ്വഭാവുള്ള നിരവധി പേര് ഓട്ടോറിക്ഷയുമായി നഗരത്തില്‍ ഉണ്ടെന്നും ഇവരാണ്‌ പ്രശ്‌നക്കാരെന്നും സ്പെഷ്യൽ ബ്രാഞ്ച്
ചുണ്ടിക്കാണിച്ചതുമാണ്‌.
ഓട്ടോറിക്ഷാ സ്‌റ്റാന്റുകളില്‍ കിടക്കാതെ കറങ്ങി നടക്കുന്ന ഇത്തരം ഓട്ടോറിക്ഷകള്‍ക്ക്‌ ആവശ്യമായ രേഖകളോ ഡ്രൈവര്‍മാര്‍ക്ക്‌ ലൈസന്‍സോ ഉണ്ടാകാറില്ല. വാഹന പരിശോധനയില്ലാത്തതിനാല്‍ കുറ്റകൃത്യങ്ങളില്‍ ഉള്‍പ്പെട്ട ഇവര്‍ക്ക്‌ നഗരം സുരക്ഷിത താവളമായിരിക്കുകയാണ്‌.
നഗരത്തില്‍ ഗതാഗതക്കുരക്ക്‌ ഉണ്ടാക്കുന്നത്‌ ഒരു ലക്ഷ്യവുമില്ലാതെ കറങ്ങി നടക്കുന്ന ഇത്തരം ഡ്രൈവര്‍മാരാണ്‌. അലക്ഷ്യമായി മറ്റു വാഹനങ്ങള്‍ക്കു മുന്നിലൂടെ ഓട്ടോറിക്ഷകള്‍ ഓടിക്കുന്നതു മൂലം അപകടങ്ങളും പതിവാണ്‌.
കറങ്ങി നടക്കുന്ന ഓട്ടോറിക്ഷകള്‍ യാത്രക്കാരുടെ സമീപത്ത്‌ ചേര്‍ത്ത്‌ നിറുത്തിയ ശേഷം ചെറിയ ഓട്ടം ആണെങ്കില്‍ ഓട്ടം പോകാന്‍ തയ്യാറാകതെ യാത്രക്കാരെ അധിക്ഷേപിക്കുന്നത്‌ പതിവാണെന്നും പരാതിയുണ്ട്‌. ഓട്ടം പോകാന്‍ ഇവരുടെ പിന്നാലെ പ്രായമായവരും സ്‌ത്രീകളുമൊക്കെ കെഞ്ചി നടക്കുന്നത്‌ പതിവു കാഴ്‌ച്ചയാണ്‌. യാത്രക്കാരെ കയറ്റാനും ഓട്ടം പോകാനുമല്ലെങ്കില്‍ എന്തിനാണ്‌ ഓട്ടോറിക്ഷാ ഡ്രൈവര്‍മാരുടെ ലേബലില്‍ ഇക്കൂട്ടര്‍ നഗരത്തില്‍ എത്തുന്നതെന്നും അന്വേഷിക്കാന്‍ പോലീസ് തയ്യാറാകാത്തതും നിഗൂഡമാണ്‌.
കൊല്ലം റെയില്‍വേസ്‌റ്റേഷന്‍ പരിസരത്ത്‌ കൂടുതല്‍ ഓട്ടോറിക്ഷകള്‍ എത്തുമ്പോള്‍ അതുവരെ ഡ്യൂട്ടി നോക്കിക്കൊണ്ടിരുന്ന ട്രാഫിക്‌ പോലീസുകാര്‍ പൊടുന്നനെ അപ്രത്യക്ഷരാകും. പിന്നെ ഡ്രൈവര്‍മാരുടെ വിളയാട്ടമാണിവിടെ.
കെ.എസ് ആര്‍ ടി സി ബസ് സ്റ്റാന്റ്, ചിന്നക്കട എന്നിവടങ്ങളിൽ സ്‌റ്റാന്റുകളില്‍ ഉള്ളതിന്റെയും ഇരട്ടി ഓട്ടോറിക്ഷകളാണ്‌ പോലീസിന്റെ അംഗീകാരം ഇല്ലാത്ത
'സമാന്തര'സ്‌റ്റാന്റിലുള്ളത്‌. റെയില്‍വേ സ്‌റ്റേഷന്‍, ചിന്നകട, കെ എസ് ആർ ടി സി, ബസ് സ്റ്റാന്റ് ജംഗ്‌ഷന്‍ വരെയുള്ള ഭാഗത്താണ്‌ 'സമാന്തര' സ്‌റ്റാന്റുകളുടെ പ്രവര്‍ത്തനം. ഇവിടെ ഓട്ടോറിക്ഷ ഓടിക്കുന്നവരാണ്‌ അംഗീകൃത സ്‌റ്റാന്റില്‍ കിടന്ന് ഓട്ടോറിക്ഷ ഓടിക്കുന്നവരുടെ പേരു കൂടി ചീത്തയാക്കുന്നത്‌. ഈ ഭാഗങ്ങളിലെ ഗതാഗത സ്‌തംഭനത്തിനും കാരണക്കാര്‍ ഇക്കൂട്ടരാണ്‌. യാത്രക്കാരില്‍ നിന്നും അമിതകൂലി ഈടാക്കുന്നതും 'സമാന്തര' സ്‌റ്റാണ്ടുകളിലെ ഡ്രൈവര്‍മാരാണ്‌.
കൊല്ലം
