വിടപറഞ്ഞ തിരു-കൊച്ചിയും രാജപ്രമുഖസ്ഥാനവും

   

പരശുരാമൻ കേരളം സൃഷ്ടിച്ചുവെന്നാണ് ഐതിഹ്യകഥ. ആ ഐതിഹ്യത്തിലെ അധികാരത്തിനുവേണ്ടിയുള്ള വടംവലിയും വഴക്കും വക്കാണവും ഇന്നും പ്രസക്തമാണ്.

കേരളം സൃഷ്ടിച്ച പരശുരാമൻ അതിനെ അറുപത്തിനാല് ഗ്രാമങ്ങളാക്കി വിഭജിച്ച് എല്ലാ ഗ്രാമങ്ങൾക്കും പ്രാതിനിധ്യമുള്ള ഭരണം ഏർപ്പെടുത്തിയെന്ന തർക്കവും വഴക്കും കാരണം ആ ഭരണസംവിധാനം തകർന്നുവെന്നാണ് ഐതിഹ്യം പറയുന്നത്.

ഇന്ത്യയിൽത്തന്നെ സ്വാതന്ത്ര്യലബ്ധിക്കുശേഷം പ്രായപൂർത്തിവോട്ടവകാശത്തിന്റെ അടിസ്ഥാനത്തിൽ ആദ്യം അധികാരത്തിൽ വന്ന സർക്കാരാണ് തിരുവിതാംകൂറിൽ പട്ടം പ്രധാനമന്ത്രിയായ(1948 മാർച്ച് 24 മുതൽ 1948 ഒക്ടോബർ 22 വരെ) മന്ത്രിസഭ. ആറുമാസത്തിലധികം നിൽക്കാൻ അതിനു കഴിഞ്ഞില്ല. അതിനുശേഷം പ്രധാനമന്ത്രിയായ പറവൂർ ടി.കെ.നാരായണപിള്ള പ്രധാനമന്ത്രിയായി. തിരുവിതാംകൂറും കൊച്ചിയും സംയോജിച്ച് തിരു-കൊച്ചി ആകുന്നതുവരെ അദ്ദേഹം തുടർന്നു.

1949 ജൂലായ് ഒന്നിന് തിരു-കൊച്ചിയുടെ രാജപ്രമുഖനായി ശ്രീചിത്തിര തിരുനാൾ മഹാരാജാവും മുഖ്യമന്ത്രിയായി പറവൂർ ടി.കെ.നാരായണപിള്ളയും അധികാരമേറ്റു. കൊച്ചിയിലെ അംഗങ്ങൾകൂടി ഉൾപ്പെട്ട ആ മന്ത്രിസഭ അഭിപ്രായഭിന്നത കാരണം 1951 െഫബ്രുവരിയിൽ നിലംപതിച്ചു. ഫെബ്രുവരിയിൽത്തന്നെ സി.കേശവന്റെ നേതൃത്തിലുള്ള പുതിയ മന്ത്രിസഭ അധികാരത്തിലെത്തി. ആ മന്ത്രിസഭയും 1952 മാർച്ചിൽ നിലംപതിച്ചു. ആ വർഷം മാർച്ചിൽ എ.ജെ.ജോൺ മുഖ്യമന്ത്രിയായി.

ഭരണകക്ഷിയായിരുന്ന തമിഴ്‌നാട് കോൺഗ്രസുകാരുടെ ചില ഡിമാൻഡുകൾ അംഗീകരിക്കാത്തതിനെത്തുടർന്ന്‌ അവർ മന്ത്രിസഭയ്‌ക്കുള്ള പിന്തുണ പിൻവലിച്ചു. ഈ സമയത്ത് നിയമസഭയിൽ അവതരിപ്പിച്ച വിശ്വാസപ്രമേയം തള്ളപ്പെട്ടതിനെത്തുടർന്ന് ആ മന്ത്രിസഭയും 1953 സെപ്‌റ്റംബറിൽ രാജിെവച്ചു. എന്നാൽ, അടുത്ത തിരഞ്ഞെടുപ്പ് വരെ ആ മന്ത്രിസഭ കെയർടേക്കറായി തുടർന്നു.

1954 മാർച്ചിൽ പട്ടം താണുപിള്ള മുഖ്യമന്ത്രിയായി. തമിഴ്‌നാട്‌ കോൺഗ്രസിന്റെ നേതൃത്വത്തിൽ തെക്കൻ താലൂക്കുകൾ തമിഴ്‌നാട്ടിൽ ലയിപ്പിക്കാനുള്ള പ്രക്ഷോഭവും മാർത്താണ്ഡം വെടിവെപ്പും തിരുവിതാംകൂർ രാഷ്ട്രീയത്തെ ഇളക്കിമറിച്ചു. ഇതേത്തുടർന്ന് നിയമസഭയിൽ വന്ന അവിശ്വാസപ്രമേയം പാസായതോടെ 1955 ഫെബ്രുവരിയിൽ പട്ടം രാജിെവച്ചു. പിന്നീട് മുഖ്യമന്ത്രിയായി പനമ്പിള്ളി ഗോവിന്ദമേനോൻ 1955 മാർച്ചിൽ ഭരണമേറ്റു. തമിഴ്‌നാട് കോൺഗ്രസുകാർ നിയമസഭയിൽ അവതരിപ്പിച്ച അവിശ്വാസപ്രമേയം വഴി 1956 മാർച്ചിൽ ആ മന്ത്രിസഭയും തകർന്നു.

അങ്ങനെ പനമ്പിള്ളി തിരു-കൊച്ചിയിലെ അവസാനത്തെ മുഖ്യമന്ത്രിയായി. ഇതേ തുടർന്ന് തിരു-കൊച്ചി പ്രസിഡന്റ് ഭരണത്തിലായി. രാജപ്രമുഖനെ സഹായിക്കാൻ പി.എസ്.റാവു ഉപദേഷ്ടാവായി എത്തി. 1956 നവംബർ ഒന്നിന് ഐക്യകേരളം നിലവിൽ വന്നതോടെ രാജപ്രമുഖനായ ശ്രീചിത്തിര തിരുനാളിനു ഭരണം നഷ്ടമായി. അദ്ദേഹത്തിന്റെ ഉപദേഷ്ടാവായിരുന്ന, പി.എസ്.റാവു കേരളത്തിലെ ആക്ടിങ് ഗവർണറായി. ഗവർണർ ഡോ. ബി.രാമകൃഷ്ണറാവു വരുന്നതുവരെ അദ്ദേഹം ആ പദവിയിൽ തുടർന്നു