ചിരട്ടയിൽ തീർക്കുന്നത് വിസ്മയരൂപങ്ങൾ

ചിരട്ടയിൽ തീർത്ത കലാരൂപങ്ങളുമായി അഭിരാം

   

രാജപുരം: ചിരട്ടകൾ ഈ വിദ്യാർഥിയുടെ കൈകളിലെത്തിയാൽ ആരും കൊതിക്കുന്ന കലാസൃഷ്ടിയായി മാറും. ചിരട്ടകൾകൊണ്ട് നിരവധി കലാരൂപങ്ങളാണ് കോടോത്ത് ജി.എച്ച്.എസ്. പ്ലസ് വൺ വിദ്യാർഥിയായ പൂടംകല്ല് ചേറ്റുകല്ലിലെ എം.അഭിരാം തീർക്കുന്നത്.

സൈക്കിൾ, കാളവണ്ടി, പൂപ്പാത്രം, സ്കൂട്ടർ, ബൈക്ക്, ഓട്ടോറിക്ഷ, ആമ, മുയൽ, കോഴി എന്നിവയുടെ ചെറുമാതൃകകളും സാനിറ്റൈസർ ബോട്ടിൽ, കീ ചെയിൻ, കപ്പ്, മുടി ഒതുക്കിവെക്കാൻ കഴിയുന്ന ക്ലിപ്പ്, മാല, മോതിരം തുടങ്ങി ചിരട്ടയിൽ തീർത്ത കലാരൂപങ്ങൾ ആരെയും ആകർഷിക്കും. കോവിഡിനെ തുടർന്ന് രണ്ടാംവട്ടവും ലോക്ഡൗൺ വന്ന സമയത്ത് വീട്ടാവിശ്യത്തിന് തേങ്ങ ചിരവിയെടുത്ത ചിരട്ടകൾ പാഴാകുന്നത് കണ്ടതോടെയാണ് അഭിരാം തന്റെ കരവിരുത് പുറത്തെടുത്തത്. മുതിർന്ന ക്ലാസിലെ വിദ്യാർഥിനി വിപിനയുടെ സഹായത്തോടെ പത്താംക്ലാസിൽ പഠിക്കുമ്പോൾ ശാസ്ത്രമേളയിൽ ചിരട്ടയിൽ രൂപങ്ങൾ നിർമിച്ച് ഉപജില്ലാതലത്തിൽ എ ഗ്രേഡ് നേടിയിരുന്നു.

ഈ സമയത്ത് ലഭിച്ച പരിശീലനം കൈമുതലാക്കിയാണ് കോവിഡ് കാലത്തിന്റെ മടുപ്പിൽ ചിരട്ടകളെ ജീവൻതുടിക്കുന്ന രൂപങ്ങളാക്കാൻ തുടങ്ങിയത്. ചിരട്ട കൂടാതെ പശ, ബ്ലേഡ്, പൂഴിക്കടലാസ്‌, പോളിഷിന് ആവശ്യമായ വസ്തുക്കൾ എന്നിവയുണ്ടെങ്കിൽ കണ്ട്പരിചയമുള്ള വസ്തുക്കളുടെ രൂപങ്ങൾ വേഗത്തിൽ നിർമിക്കാമെന്ന് അഭിരാം പറയുന്നു