ഇന്ന് അംബേദ്കര്‍ ജയന്തി

                                               

അടിയാളൻ മാരുടെ രക്ഷകൻ സവർണ്ണ പീഠനത്തിൽ നിന്ന് ഇന്തൃൻ ദലിദു കൾക്ക് മോചനവും പ്രതീക്ഷയും നൽകിയ മഹാൻ

പുതിയ ഭരണഘടന 1949 നവംബര്‍ 26ന് പാര്‍ലമെന്റില്‍ അവതരിപ്പിച്ചു കൊണ്ട് ഡോ. അംബേദ്കര്‍ ഇങ്ങനെ പ്രഖ്യാപിച്ചു. 

''ഭാരതീയരായ നാം, നമ്മുടെ ഭരണഘടനയും സ്വാതന്ത്ര്യവും ഭാരതത്തിലെ ഒരു കുഞ്ഞുള്ളകാലം വരെ ചോരയും ജീവനും നല്‍കി സംരക്ഷിക്കും''

ഡോ. ബി.ആര്‍. അംബേദ്കറിന്റെ 123ാം ജയന്തി ഭാരതമെമ്പാടും ആഘോഷിക്കുന്ന ഈ അവസരത്തില്‍ അദ്ദേഹത്തെ ഓര്‍ക്കുകയെന്നതിന് പ്രത്യേക പ്രസക്തിയുണ്ട്.

ഇന്ത്യയില്‍ ഒരു സാംസ്‌കാരികവിപ്ലവത്തിന് തുടക്കംകുറിച്ച വ്യക്തിയായിരുന്നു ഡോ. അംബേദ്കര്‍. ജീവിച്ചിരുന്നപ്പോഴും മരണശേഷവും ജാതിഹിന്ദുക്കള്‍ക്ക് അദ്ദേഹവും അദ്ദേഹത്തിന്റെ പ്രസ്ഥാനവും എതിരായിരുന്നു. തുടക്കംമുതല്‍തന്നെ ഗാന്ധിജിയും അംബേദ്കറും രണ്ട് ധ്രുവങ്ങളിലായിരുന്നു.

ഇന്ത്യന്‍ സ്വാതന്ത്ര്യസമരചരിത്രത്തില്‍ അവിസ്മരണീയ സംഭവങ്ങള്‍ക്ക് സാക്ഷ്യംവഹിച്ച ഡോ. അംബേദ്കറെ ഇന്ത്യയുള്ള കാലത്തോളം ആര്‍ക്കും വിസ്മരിക്കാന്‍ കഴിയില്ല. പക്ഷേ, വിസ്മരിച്ചവര്‍ ഇല്ലേ എന്നുചോദിച്ചാല്‍ ഉണ്ട് എന്ന് പറയേണ്ടിവരും. ആറ്റന്‍പ്രഭുവെന്ന വെള്ളക്കാരന്‍ സായ്പ് നിര്‍മിച്ച 'ഗാന്ധി' ചിത്രത്തില്‍ ഒരിടത്തുപോലും ഡോ. അംബേദ്കറെ ചിത്രീകരിച്ചിട്ടില്ല. ഡോ. അംബേദ്കറില്ലാതെ ഗാന്ധിജിയുടെ ജീവിതം പൂര്‍ണമാവുകയുമില്ല. ഗാന്ധിജിയെ ഒരു ഹരിജനോദ്ധാരകനാക്കിയതിന്റെ പിന്നിലെ പ്രധാന പ്രേരകശക്തി ഡോ. അംബേദ്കറായിരുന്നുവെന്ന സത്യം അധികമാര്‍ക്കുമറിയില്ല. അതല്ലാതെ ഗാന്ധിജി സ്വയം ഒരു സുപ്രഭാതത്തില്‍ ഹരിജനോദ്ധാരകനായതല്ല.

അതുപോലെ ഒട്ടേറെ ഒച്ചപ്പാടുകള്‍ക്ക് കളമൊരുക്കിയ ലാറി കോളിന്‍സും ഡൊമിനിക് ലാപിയറും ചേര്‍ന്നെഴുതിയ 'സ്വാതന്ത്ര്യം അര്‍ധരാത്രി'യില്‍ എന്ന ഗ്രന്ഥത്തിലും മഹാനായ ഡോ. അംബേദ്കറെ ബോധപൂര്‍വം അതല്ലെങ്കില്‍ മനഃപൂര്‍വം തമസ്‌കരിച്ചിരിക്കുകയാണ്. ഡോ. അംബേദ്കറില്ലാതെ ഇന്ത്യന്‍ സ്വാതന്ത്ര്യസമരചരിത്രത്തെക്കുറിച്ചെഴുതിയാല്‍ അത് ഇന്ത്യയുടെ ചരിത്രമാവില്ല. ആദ്യത്തെ വട്ടമേശ സമ്മേളനത്തില്‍ പങ്കെടുത്ത ഡോ. അംബേദ്കറെ വിസ്മരിച്ചത് ക്ഷന്തവ്യമല്ല. 

1891 ഏപ്രില്‍ 14ന് മഹാരാഷ്ട്ര സംസ്ഥാനത്തെ രത്‌നഗിരി ജില്ലയില്‍ അംബേവാഡേ ഗ്രാമത്തില്‍ ജനിച്ച ഡോ. അംബേദ്കറുടെ അച്ഛനമ്മമാരിട്ട പേര് 'ഭീം' എന്നായിരുന്നു. താണജാതിയെന്ന് സവര്‍ണ വെറിയന്മാര്‍ പറയുന്ന 'മഹര്‍' ജാതിയിലാണ് അദ്ദേഹം ജനിച്ചത്.
പട്ടാളത്തില്‍ ഒരു സുബേദാറായിരുന്ന രാംജി സക്പാലിന്റെ പതിന്നാലാമത്തെ മകനായിരുന്നു ഭീം.

നന്നേ ചെറുപ്പത്തില്‍ത്തന്നെ സവര്‍ണവെറിയന്‍മാരുടെ അനാചാരങ്ങള്‍ക്ക് കൊച്ചു ഭീം ബലിയാടായിരുന്നു. ഈ അനുഭവങ്ങളായിരുന്നു പില്കാലത്ത് ഭീമിന് തന്റെ ചുറ്റിലും നടമാടിക്കൊണ്ടിരുന്ന സാമൂഹിക അനാചാരങ്ങള്‍ക്കെതിരെ പൊരുതാന്‍ ആവേശവും കരുത്തും പകര്‍ന്നത്.

പ്രാഥമികവിദ്യാഭ്യാസാനന്തരം ഹൈസ്‌കൂള്‍പഠനം നടത്തുകയും മെട്രിക്കുലേഷന്‍ പരീക്ഷ പാസാവുകയും ചെയ്തു ഭീം. തുടര്‍ന്ന് കോളേജിലെത്താന്‍ അംബേദ്കര്‍ക്ക് ബറോഡ മഹാരാജാവിന്റെ സ്‌കോളര്‍ഷിപ്പ് നേടേണ്ടിവന്നു. ഒടുവില്‍ പ്രശസ്തമായ നിലയില്‍ അംബേദ്കര്‍ ബി.എ. പാസായി. മെട്രിക്കുലേഷന്‍ പരീക്ഷ പാസായ സന്ദര്‍ഭത്തില്‍ തന്നെ 17കാരനായ അംബേദ്കര്‍ ഒമ്പതുകാരിയായ രമാബായി എന്ന പെണ്‍കുട്ടിയെ സമുദായാചാരപ്രകാരം ഒരു ചന്തയില്‍വെച്ച് വിവാഹം കഴിച്ചു. കോളേജ് പഠനം പൂര്‍ത്തീകരിച്ച അംബേദ്കര്‍ 1912ല്‍ ബറോഡ സൈന്യത്തില്‍ ഒരു ലെഫ്റ്റനന്റായി ഔദ്യോഗികജീവിതം ആരംഭിച്ചു. തുടര്‍ന്ന് ബറോഡ ഗവണ്‍മെന്റിന്റെ സ്‌കോളര്‍ഷിപ്പ് നേടിക്കൊണ്ട് അംബേദ്കര്‍ ഉപരിപഠനത്തിനായി അമേരിക്കയിലേക്കും പുറപ്പെട്ടു. അയിത്ത ജാതിക്കാരനായ ഒരു ഇന്ത്യക്കാരന്‍ ആദ്യമായിട്ടായിരുന്നു ഉപരിപഠനാര്‍ഥം വിദേശ രാജ്യത്തെത്തുന്നത്. കൊളംബിയ സര്‍വകലാശാലയിലും ലണ്ടനിലെ ഗ്രെയിസ്ഇന്നിലും ജര്‍മനിയിലെ ബോണ്‍ സര്‍വകലാശാലയിലുമായി അംബേദ്കര്‍ ഉന്നതവിദ്യാഭ്യാസം നടത്തുകയും ഉന്നതമായ ബിരുദങ്ങള്‍ നേടുകയും ചെയ്തു.

വിദേശവിദ്യാഭ്യാസം പൂര്‍ത്തീകരിച്ച് ഇന്ത്യയില്‍ തിരിച്ചെത്തിയ ഡോ. അംബേദ്കറെ ബറോഡ മഹാരാജാവ് 1917ല്‍ തന്റെ മിലിട്ടറി സെക്രട്ടറിയായി നിയമിച്ചു.
1927ല്‍ അംബേദ്കര്‍ ബോംബെ നിയമസഭാ മെമ്പറായി തിരഞ്ഞെടുക്കപ്പെട്ടു.
1935ലാണ് ഡോ.അംബേദ്കര്‍ അധഃസ്ഥിതര്‍ക്കായി 'ഇന്‍ഡിപെന്‍ഡന്റ് ലേബര്‍പാര്‍ട്ടി'യെന്ന രാഷ്ട്രീയ കക്ഷിക്ക് രൂപം കൊടുത്തത്. 1946ല്‍ നെഹ്രുവിന്റെ നേതൃത്വത്തിലുണ്ടായ ഇടക്കാല മന്ത്രിസഭ ഇന്ത്യയില്‍ അധികാരത്തില്‍ വന്നപ്പോള്‍ കോണ്‍സ്റ്റിറ്റിയുവന്റ് അസംബ്‌ളിയിലേക്ക് തിരഞ്ഞെടുപ്പ് പ്രഖ്യാപിച്ചു. അംബേദ്കര്‍ ബംഗാളില്‍നിന്ന് മത്സരിച്ച് വിജയിച്ചു. പാകിസ്താന്റെ ഉദയത്തോടൊപ്പം ഡോ. അംബേദ്കറുടെ കോണ്‍സ്റ്റിറ്റിയുവന്റ് അസംബ്‌ളിയിലെ അംഗത്വം നഷ്ടപ്പെട്ടു. കിഴക്കന്‍ പാകിസ്താനിലെ ആ മണ്ഡലമിപ്പോള്‍ ബംഗ്‌ളാദേശിലാണ്. തുടര്‍ന്ന് നെഹ്രുവിന്റെ നേതൃത്വത്തില്‍ ഒരു കേന്ദ്രമന്ത്രിസഭയുണ്ടാക്കി. ആ മന്ത്രിസഭയില്‍ ഡോ. അംബേദ്കറെ നിയമവകുപ്പ് മന്ത്രിയായി നിയമിച്ചു. അങ്ങനെ ഇന്ത്യയിലെ ആദ്യ നിയമമന്ത്രിയെന്ന ഖ്യാതി അംബേദ്കര്‍ക്ക് ലഭിച്ചു.

ഈ സന്ദര്‍ഭത്തില്‍ ഇന്ത്യയ്ക്ക് സ്വന്തമായി ഒരു ഭരണഘടനയുടെ ആവശ്യം നേരിട്ടു. നിയമവകുപ്പുമന്ത്രിയായ ഡോ. അംബേദ്കറെതന്നെ ഭരണഘടനാ നിര്‍മാണസമിതിയുടെ ചെയര്‍മാനായി നിയമിച്ചു. ഡോ. അംബേദ്കറെ കൂടാതെ, അല്ലാഡി കൃഷ്ണസ്വാമി അയ്യര്‍, എന്‍. ഗോപാലസ്വാമി അയ്യങ്കാര്‍, കെ.എം. മുന്‍ഷി, ഡോ. രാജേന്ദ്രപ്രസാദ്, വി.ടി. കൃഷ്ണമാചാരി, നെഹ്രു, സര്‍ദാര്‍ വല്ലഭ്ഭായി പട്ടേല്‍, ബി.എന്‍. റാവു എന്നിവര്‍ കമ്മിറ്റി അംഗങ്ങളുമായിരുന്നു.

141 ദിവസത്തെ നിരന്തരപ്രയത്‌നത്തിന്റെ ഫലമായി ഇന്ത്യന്‍ ഭരണഘടനയ്ക്ക് ഡോ. അംബേദ്കര്‍ രൂപം നല്‍കി. കമ്മിറ്റി മെമ്പര്‍മാര്‍ പലരുണ്ടായിട്ടും ഡോ. അംബേദ്കറുടെ അശ്രാന്തപരിശ്രമം ഒന്നുകൊണ്ടായിരുന്നു ഭരണഘടന തയ്യാറാക്കാന്‍ സാധിച്ചതുതന്നെ. 1935ലെ ഗവണ്‍മെന്റ് ഓഫ് ഇന്ത്യാ ആക്ടും ഭരണഘടനാ നിര്‍മാണവേളയില്‍ പരിശോധിക്കപ്പെടുകയുണ്ടായി. പുതിയ ഭരണഘടന 1949 നവംബര്‍ 26ന് പാര്‍ലമെന്റില്‍ അവതരിപ്പിച്ചു കൊണ്ട് ഡോ. അംബേദ്കര്‍ ഇങ്ങനെ പ്രഖ്യാപിച്ചു. ''ഭാരതീയരായ നാം, നമ്മുടെ ഭരണഘടനയും സ്വാതന്ത്ര്യവും ഭാരതത്തിലെ ഒരു കുഞ്ഞുള്ളകാലം വരെ ചോരയും ജീവനും നല്‍കി സംരക്ഷിക്കും''. 1950 ജനവരി 20ന് പ്രാബല്യത്തില്‍വന്ന ഇന്ത്യന്‍ ഭരണഘടനയില്‍ 15, 16, 17, 19, 25, 29, 46, 164, 244, 330, 332, 334, 335, 338 എന്നീ വകുപ്പുകളിലും 50, 60 പട്ടികകളിലുമായിട്ടാണ് പട്ടികജാതിക്കാരുടെ പ്രശ്‌നങ്ങള്‍ പരിഹരിക്കാന്‍ ഊന്നല്‍ നല്‍കിയിട്ടുള്ളത്. എന്നാല്‍, ഇവയൊന്നും തന്നെ സര്‍ക്കാര്‍ പരിഗണിക്കപ്പെടുന്നില്ലെന്നത് ഉത്കണ്ഠാകുലമായ സംഗതിയാണ്. 

1951ല്‍ ഡോ. അംബേദ്കര്‍ തയ്യാറാക്കിയ ഹിന്ദുകോഡ് ബില്‍ പാര്‍ലമെന്റില്‍ അവതരിപ്പിച്ചുവെങ്കിലും ബില്‍ പാസാകാത്തതില്‍ പ്രതിഷേധിച്ച് 1951 സപ്തംബര്‍ 27ന് അദ്ദേഹം കേന്ദ്രമന്ത്രിസഭയില്‍നിന്ന് രാജിവെച്ചു. അതോടൊപ്പംതന്നെ ഹിന്ദുമതത്തോടും അവയിലെ അനാചാരങ്ങളിലും പ്രതിഷേധിച്ചുകൊണ്ട് 1956 ഒേക്ടാബര്‍ 14ന് മൂന്നുലക്ഷം അനുയായികളോടൊപ്പം ഡോ. അംബേദ്കര്‍ ബുദ്ധമതം സ്വീകരിച്ചു. ഇതേവര്‍ഷം തന്നെ അദ്ദേഹം ഇന്‍ഡിപെന്‍ഡന്റ് ലേബര്‍ പാര്‍ട്ടിക്ക് പകരം പട്ടികജാതിക്കാര്‍ക്കായി 'റിപ്പബ്‌ളിക്കന്‍ പാര്‍ട്ടി ഓഫ് ഇന്ത്യ' എന്ന രാഷ്ട്രീയപാര്‍ട്ടിക്കും ജന്മം നല്‍കി. റിപ്പബ്‌ളിക്കന്‍ പാര്‍ട്ടി ഇന്ന് വിഭാഗീയത കാരണം പലതുണ്ടുകളായി വിഭജിക്കപ്പെട്ട അവസ്ഥയിലാണ്. അതില്‍ ഗവായി ഗ്രൂപ്പിനും അത്വാല ഗ്രൂപ്പിനും പ്രാമുഖ്യമുണ്ട്.

ഒട്ടേറെ പ്രബന്ധങ്ങളുടെയും പ്രമുഖ ഗ്രന്ഥങ്ങളുടെയും കര്‍ത്താവ് കൂടിയാണ് ഡോ. അംബേദ്കര്‍, 1956 ഡിസംബര്‍ അഞ്ചിന് രാത്രിയില്‍ സിലോണില്‍ നിന്നെത്തിയ ഏതാനും ബുദ്ധഭിക്ഷുക്കളുമായി അദ്ദേഹം ആശയവിനിമയം നടത്തി. രാത്രിയില്‍ ഉറങ്ങാന്‍ കിടന്ന അദ്ദേഹം പിന്നീട് ഉണര്‍ന്നില്ല. ഡിസംബര്‍ ആറിന് പുലര്‍ച്ചെ ചായയും കൊണ്ടുചെന്ന പരിചാരകന്‍ കണ്ടത് ഡോ. അംബേദ്കര്‍ മരിച്ചുകിടക്കുന്നതാണ്.

പാവങ്ങളുടെ പടതലവൻ...
ഭരണഘടനയുടെ രചയിതാവ്....
ഡോ. അംബേദ്ക്കർ....

ഇല്ല അങ്ങ് മരിച്ചിട്ടില്ല...
ജീവിക്കുന്നു ഭാരത മക്കളിലൂടെ..
ജയ് ബോലോ ഭാരത് മാതാ കീ...
ജയ് ബോലോ അംബേദ്കർ കീ ജയ്.