മൂക്കുകയറില്ലാതെ തട്ടുകടകൾ പരിശോധന വേണമെന്ന ആവശ്യം ശക്തമാകുന്നു.

മൂക്കുകയറില്ലാതെ തട്ടുകടകൾ പരിശോധന വേണമെന്ന ആവശ്യം ശക്തമാകുന്നു.

കൊല്ലം : '' ചേട്ടാ, ഒരു കട്ടൻ, മൂന്ന് പൊറോട്ട, ഒരു ബീഫ്''പാത്രം അത്ര വൃത്തിയില്ലേലും നല്ല വിശപ്പുണ്ടായിരുന്നതിനാൽ ഓർഡർ ചെയ്തതൊക്കെ കുഴച്ചടിക്കുമ്പോൾ 'ഫ്രീക്കൻ പയ്യൻ' മറ്റൊന്നും നോക്കിയില്ല. കൈ കഴുകി ചെറിയൊരു ഏമ്പക്കവും വിട്ട് വില തിരക്കിയപ്പോൾ ദഹിച്ചോയെന്നൊരു സംശയം. രണ്ടു മൂളലും ഒരു ഒരു തലച്ചൊറിലിനും ശേഷം നരച്ച താടി തടവി കടക്കാരൻ പറഞ്ഞു- ''നൂറ്റി മുപ്പത്'. ഫൈവ് സ്റ്റാർ തട്ടുകടയോ എന്ന സംശയത്തിൽ നൂറ്റിമുപ്പതോ എന്ന് തിരിച്ച് ചോദിച്ചപ്പോഴേക്കും കടക്കാരന്റെ സ്വരത്തിൽ ഒരു ഭാവമാറ്റം. ''അതേ നൂറ്റിമുപ്പത്''. 

ചുണ്ടിൽ നിന്ന് ചാടാൻ കൊതിച്ച പച്ചത്തെറി വീഴുങ്ങി പറഞ്ഞകാശും കൊടുത്തു മടങ്ങുകയേ മാർഗമുണ്ടായിരുന്നുള്ളൂ പാവം പയ്യന്. കഴിച്ച പ്ളെയിറ്റ് കൂട്ടിയിട്ട സ്ഥലത്തേക്ക് നോക്കിയപ്പോഴാണ് ഓടയിൽ നിന്ന് എലിയും പാറ്റയും പാത്രത്തിനും ചുറ്റും വട്ടമിടുന്നു. ഹോട്ടലുകളെ മാത്രം ഉന്നം വച്ച് പരിശോധനകൾ തകർക്കുമ്പോൾ നഗരത്തിലെ തട്ടുകടകൾ മൂക്കുകയറില്ലാതെ പായുകയാണ്. വൃത്തിയില്ലാത്ത ആഹാരവും കഴുത്തറപ്പൻ പണവും വാങ്ങുന്ന തട്ടുകടകളെ പരിശോധിക്കാൻ ഇതുവരെ നടപടിയില്ല.

പല തട്ടുകടകളിലും ആഹാരം പാകം ചെയ്യുന്ന പരിസരം കണ്ടാൽ കഴിക്കാതെ ഇറങ്ങിപ്പോകാൻ തോന്നും. മാലിന്യങ്ങൾ തള്ളുന്നിടത്തും പൊതുജനങ്ങൾ മൂത്രവിസർജനം നടത്തുന്നിടത്തുമാണ് പ്രവർത്തിക്കുന്നത്. ആവശ്യമുള്ള വെള്ളം കന്നാസുകളിൽ നിറച്ച് കൊണ്ടുവരികയാണ്.ഇത് എവിടെ നിന്ന് ശേഖരിക്കുന്നതാണെന്ന് ആർക്കുമറിയില്ല. മഴ പെയ്താൽ പൊട്ടിപ്പൊളിഞ്ഞ ടാർപ്പോളിനിടയിലൂടെ മഴവെള്ളം ഇറ്റിറ്റ് ഭക്ഷണ പദാർത്ഥങ്ങളിലേക്ക് വീഴും.

തിരക്കേറിയ റോഡിൽകൂടി വാഹനങ്ങൾ ചീറിപ്പായുമ്പോൾ പൊടിപടലങ്ങളും മറ്റു മാലിന്യങ്ങളും പറന്ന് തുറസ്സായസ്ഥലത്ത് സ്ഥിതിചെയ്യുന്ന തട്ടുകടകളിലെ ഭക്ഷണത്തിൽ കലരുന്നത് ഗുരുതരമായ ആരോഗ്യപ്രശ്‌നങ്ങൾക്ക് വഴിവെയ്ക്കും. 

രുചികളുടെയോ വിഭവങ്ങളുടെയോ പേര് തട്ടുകടകൾക്കിട്ടാണ് ഇപ്പോൾ ജനങ്ങളെ ആകർഷിക്കുന്നത്.ഭക്ഷണസാധനങ്ങളിൽ നിന്നും ഉയർന്നു പൊങ്ങുന്ന മണമാണ് ജനങ്ങളെ തട്ടുകടയിലേക്ക്കൂട്ടിക്കൊണ്ട് പോകുന്നത്. കൂണ് പോലെ മുളക്കുന്ന തട്ടുകടകളിലെ ഭക്ഷണങ്ങളുടെ ഗുണനിലവാരം പരിശോധനക്ക് വിധേയമാക്കേണ്ടതാണ്. ഭക്ഷ്യവിഷബാധ ഏൽക്കുന്നതിന് കാത്തുനിൽക്കാതെ അതിന് മുമ്പേ പരിശോധന നടത്തണമെന്ന ആവശ്യം ശക്തമാണ്.

@ പരിശോധിക്കുന്നതിലും ഭിന്നത

ഹോട്ടലുകളിൽ നടത്തുന്ന റെയ്ഡ് തട്ടുകടകളിലേക്കും വ്യാപിപ്പിക്കുമെന്ന് ഉദ്യോഗസ്ഥർ പറയുന്നത് അല്ലാതെ 

.പരിശോധന എന്ന് തുടങ്ങണമെന്ന് തീരുമാനിച്ചിട്ടില്ല.ഹോട്ടലുകളിൽ വ്യാപകമായി  റെയ്ഡ്  നടക്കുന്നത് കണ്ട്  ചില തട്ടുകടകൾ ശുചിത്വം പാലിക്കാൻ ശ്രദ്ധിക്കുന്നുണ്ടെന്നാണ്

ഭക്ഷ്യവകുപ്പ്ഉദ്യോഗസ്ഥർ പറയുന്നത്.

.രാത്രികാലങ്ങളിൽ  തട്ടുകടകൾ പ്രവർത്തിക്കുന്നു എന്നതിനാലാണ് റെയ്ഡ് നടത്താൻ പ്രയാസമെന്നും അവർ പറയുന്നു.