സത്യം പുറത്തു വരുന്ന അന്വേഷണം വേണം

ബിഷപ്പായിരിക്കെ കന്യാസ്ത്രീയെ ബലാത്സംഗം ചെയ്തുവെന്ന കേസിൽ പ്രതിയായ ഫ്രാങ്കോ മുളയ്ക്കലിനെതിരായി പൊലീസിൽ മൊഴി നൽകിയ ഫാദർ. കുര്യാക്കോസ് കാട്ടുതറയുടെ ദുരൂഹമരണത്തെക്കുറിച്ച് സത്യസന്ധമായ അന്വേഷണം ആവശ്യമായി വന്നിരിക്കുകയാണ്. ബിഷപ്പിനെതിരായി സംസാരിച്ചതിന്റെ പേരിൽ വികാരി പദവിയിൽ നിന്നു തരം താഴ്ത്തപ്പെട്ട് ജലന്ധർ രൂപതാ കൗൺസിൽ റസിഡന്റ് പ്രീസ്റ്റായി കഴിഞ്ഞിരുന്ന ഫാ. കാട്ടുതറയെ അദ്ദേഹത്തിന്റെ താമസസ്ഥലത്ത് തിങ്കളാഴ്ച രാവിലെ മരിച്ച നിലയിൽ കാണപ്പെടുകയായിരുന്നു. ജലന്ധറിലെ ദൗസപള്ളിയിലെ പ്രാർത്ഥനാ ചുമതല മാത്രമാണ് അദ്ദേഹത്തിന് നൽകിയിരുന്നത്. ഫ്രാങ്കോ മുളയ്ക്കലിന് എതിരെ മൊഴി നൽകിയ നാൾ മുതൽ അദ്ദേഹം നോട്ടപ്പുള്ളിയായിരുന്നു എന്നാണ് പുറത്തുവന്നിട്ടുള്ള വിവരം. മുളയ്ക്കലിന്റെ ആൾക്കാർ നിരന്തരം ഫാ. കാട്ടുതറയെ പല വിധത്തിലും ഭീഷണിപ്പെടുത്തിയിരുന്നുവത്രെ. താൻ നിരന്തരം ജീവഭയത്തിൽ കഴിയുകയാണെന്ന് അടുപ്പക്കാരോടും ബന്ധുക്കളോടും അദ്ദേഹം പറയാറുണ്ടായിരുന്നു എന്ന വിവരവും പുറത്തുവന്നിട്ടുണ്ട്. രാത്രികാലങ്ങളിൽ വീടിനു നേരെ ഗുണ്ടാഭീഷണി നിലനിന്നിരുന്നു. ഫോണിലൂടെയും ഭീഷണി എത്തിയിരുന്നു. പൊലീസിൽ പീഡന പരാതി നൽകിയ കന്യാസ്ത്രീ മുളയ്ക്കലിൽ നിന്നു നേരിടേണ്ടിവന്ന ദുരനുഭവങ്ങൾ ഫാ. കാട്ടുതറയോടു പങ്കവച്ചിരുന്നു. സമാനമായ അനുഭവങ്ങളുണ്ടായ വേറെയും കന്യാസ്ത്രീകൾ ഫാ. കാട്ടുതറയോട് എല്ലാം തുറന്നു പറഞ്ഞിരുന്നു. ഇതെല്ലാം വച്ചുനോക്കുമ്പോൾ ഫ്രാങ്കോ മുളയ്ക്കലിനെതിരായ പീഡനക്കേസിൽ ഫാ. കാട്ടുതറ നിർണായക സാക്ഷിയായി മാറേണ്ടതായിരുന്നു. തീർത്തും ദുരൂഹമായ സാഹചര്യത്തിൽ അദ്ദേഹം മരണപ്പെട്ടത് ഗൗരവമേറിയ അനവധി ചോദ്യങ്ങൾ ബാക്കിവച്ചാണ്. ഇതിന് ഉത്തരം കണ്ടെത്തേണ്ട ജോലിയാണ് പൊലീസിൽ വന്നു ചേർന്നിരിക്കുന്നത്. മരണമുണ്ടായത് പഞ്ചാബിലായതിനാൽ അവിടത്തെ പൊലീസിനാണ് സത്യം കണ്ടെത്താനുള്ള ദൗത്യം.

ഇത് അവർ നീതിക്കും സത്യത്തിനും നിരക്കുംവിധം നിർവഹിക്കുമോ എന്ന ചോദ്യവും ഉയരുന്നുണ്ട്. മരണപ്പെട്ട ആൾ മലയാളിയും ചേർത്തല സ്വദേശിയുമായ നിലയ്ക്ക് കേസ് കൈവിട്ടു പോകാതാരിക്കാൻ സംസ്ഥാന സർക്കാരിന് ചുമതലയുണ്ട്. ഫാ. കാട്ടുതറയുടെ ദുരൂഹമരണത്തിന് പിന്നിലെ സത്യാവസ്ഥ സംശയങ്ങൾ ശേഷിക്കാതെ പുറത്തുകൊണ്ടുവരാൻ പഞ്ചാബ് പൊലീസിന്റെ മേൽ കേരളസർക്കാർ പരമാവധി സമ്മർദ്ദം ചെലുത്തണം. ഇതിൽ പഞ്ചാബ് പൊലീസ് പരാജയപ്പെട്ടാൽ അന്വേഷണം സി.ബി.ഐയെ ഏല്പിക്കാനുള്ള മാർഗം തേടണം. മുളയ്ക്കലിന് ഭരണകേന്ദ്രങ്ങളിലും ഔദ്യോഗികതലങ്ങളിലുമുള്ള വിപുലമായ സ്വാധീനവും പിടിപാടും വച്ചുനോക്കുമ്പോൾ ഫാ.കാട്ടുതറയുടെ ബന്ധുക്കൾക്കും മറ്റു പ്രിയപ്പെട്ടവർക്കും ആശ്വസിക്കാനുള്ള വക തുലോം കുറവാണ്. എന്നിരുന്നാലും മരണത്തിലെ ദുരൂഹത പൂർണമായും മറ നീക്കേണ്ടത് സമൂഹത്തിന്റെ ആവശ്യമായതിനാൽ സംസ്ഥാന സർക്കാർ ഉറച്ച നിലപാട് തന്നെ ഈ വിഷയത്തിൽ എടുക്കേണ്ടതുണ്ട്. ഞായറാഴ്ച ഉച്ചയ്ക്ക് ഭക്ഷണത്തിന് ശേഷം സ്വന്തം മുറിയിൽ വിശ്രമത്തിനുപോയ ഫാ. കാട്ടുതറ പിന്നീട് പുറത്തുവന്നിട്ടില്ലെന്നാണ് പരിചാരികർ പൊലീസിൽ മൊഴി നൽകിയത്. അവിടെ തുടങ്ങുന്നു മരണത്തെ ചുറ്റിപ്പറ്റിയുള്ള നിഗൂഢതകൾ. പള്ളിയുടെ ചുമതലയുള്ള ഫാദർ അത്താഴത്തിനു പോലും മുറിവിട്ട് പുറത്തുവരാതിരുന്നിട്ടും ആരും അന്വേഷിച്ചില്ലെന്നത് തീർത്തും അവിശ്വസനീയമാണ്. തിങ്കളാഴ്ച രാവിലെ സഹായി ചെന്നു വിളിച്ചിട്ടും മുറി തുറക്കാതിരുന്നപ്പോഴാണത്രെ ആളുകളെ വിളിച്ചുകൂട്ടി വാതിൽ തകർത്ത് അകത്ത് കടന്നത്.

ഫാ. കാട്ടുതറ മുറിയിൽ മരിച്ചു കിടക്കുകയായിരുന്നു. പൊലീസും മറ്റും എത്തുന്നത് ഇതിന് ശേഷമാണ്. ഫാ. കാട്ടുതറയുടെ ഇളയസഹോദരൻ ഉൾപ്പെടെയുള്ള ബന്ധുക്കൾ മരണത്തിൽ സംശയം പ്രകടിപ്പിച്ച്, പൊലീസിൽ മൊഴി നൽകിയ സ്ഥിതിയ്ക്ക് വസ്തുനിഷ്ഠമായ അന്വേഷണം അനിവാര്യമായിട്ടുണ്ട്. ഫ്രാങ്കോ മുളയ്ക്കലിന്റെ ആൾക്കാരിൽ നിന്ന് നിരന്തര ഭീഷണി നേരിട്ടിരുന്നതുമൂലം കാട്ടുതറ ഏറെ ഭയന്നാണ് ജീവിച്ചിരുന്നതെന്ന് ബന്ധുക്കൾ പറയുന്നു. അതിന്റെ കടുത്ത സമ്മർദ്ദം അനുഭവിക്കേണ്ടിവന്നതിലെ ആഘാതവുമാകാം ഒരുപക്ഷേ ഈ അകാലമരണത്തിലേക്ക് നയിച്ചത്. ഏതായാലും വിശദമായ അന്വേഷണത്തിലൂടെ മാത്രമേ സത്യം പുറത്തുവരികയുള്ളൂ. ഫാ. കാട്ടുതറയുടെ മരണം ഫ്രാങ്കോ മുളയ്ക്കലിനെതിരായ നിലപാടുമായി നിൽക്കുന്ന കന്യാസ്ത്രീ കൂട്ടായ്മ ഉൾപ്പെടെ പലരെയും അസ്വസ്ഥരാക്കുന്നുണ്ട്. ജാമ്യം ലഭിച്ചു പുറത്തുവരുന്ന മുളയ്ക്കലിനെ അവരൊക്കെ ഭയത്തോടെയാണ് കണ്ടിരുന്നത്. ഈ ഭയാശങ്കകൾ ശക്തമാക്കുന്നതാണ് ഫാ. കാട്ടുതറയുടെ ദുരൂഹമരണം. എതിർത്തു മൊഴി നൽകിയവരും മുളയ്ക്കലിനെതിരെ പരസ്യമായി തെരുവിൽ സമരത്തിനിറങ്ങിയവരുമെല്ലാം തികഞ്ഞ ആശങ്കയിലാണിപ്പോൾ. ഇവരെ ഇതിൽ നിന്നു മോചിപ്പിക്കാൻ കാട്ടുതറയുടെ മരണത്തെക്കുറിച്ചുള്ള നിഷ്പക്ഷമായ അന്വേഷണമാണ് ആവശ്യം. സഭകളിലെ ഉന്നതന്മാർ നടത്തുന്ന കൊള്ളരുതായ്മകൾക്കെതിരെ ശബ്ദമുയർത്തുന്നവർ ക്രൂശിക്കപ്പെടുന്നത് ആദ്യമായിട്ടൊന്നുമല്ല. തെളിയാതെ കിടക്കുന്ന നിരവധി ദുരൂഹ മരണങ്ങളിൽ ഒന്നുകൂടി എന്നാകരുത് ഫാ. കാട്ടുതറയുടെ അകാലമരണം.