വാക്കുകൾ കൊണ്ടോ കർമ്മം കൊണ്ടോ നാം ആരെയും വേദനിപ്പിക്കാതെ ഇരിക്കുക

വാക്കുകൾ കൊണ്ടോ കർമ്മം കൊണ്ടോ നാം ആരെയും വേദനിപ്പിക്കാതെ ഇരിക്കുക.. വാവിട്ട വാക്കും കൈവിട്ട കല്ലും തിരിച്ചെടുക്കാൻ എളുപ്പമല്ല..ചില സമയത്ത് നാം പറയുന്ന വാക്കുകൾ ചിലപ്പോഴൊക്കെ മറ്റു ഹൃദയങ്ങളിലും പിന്നിട് നമ്മുടെ ഹൃദയത്തിലും  നോവായി മാറാറുണ്ട്..ചില വാക്കുകൾ അറം പറ്റിയ പോലെ സംഭവിക്കുന്നു ..യാദൃശ്ചികമായി സംഭവിക്കുന്നതാകാം എന്നാലും നമ്മളിൽ നിന്നും അപ്രകാരം വാക്ക് ഉണ്ടായല്ലോ എന്ന സങ്കടം നമുക്കും  കേൾക്കുന്നവർക്കും വന്നു ചേരാം. 

     നാവ് തന്നെയാണ് നമ്മുടെ ശത്രുവും മിത്രവും.വാക്കുകൾ ഉപയോഗിക്കുമ്പോൾ സൂക്ഷിച്ച് ഉപയോഗിക്കണം.നല്ലവണ്ണം ആലോചിച്ചു മാത്രമേ വാക്കുകൾ പ്രയോഗിക്കാവു.. കോപം വരുമ്പോൾ എന്താണ് പറയുന്നത് എന്ന് നമുക്ക് തന്നെ മനസ്സിലാവില്ല.പിന്നിടായിരിക്കും നാം എന്താണ് പറയുന്നത് എന്ന് ചിന്തിക്കുക. .

      ക്ഷമിക്കാൻ ശീലിക്കുക. ക്ഷമയെക്കാൾ ഉത്തമമായ മരുന്ന് കോപത്തിന് ഇല്ല..ഈശ്വര നാമം ജപിക്കുന്നതിലൂടെ നമ്മുടെ വാക്കുകളുടെ കാഠിന്യം കുറയുകയും , സൗമ്യമായും ശാന്തമായും പെരുമാറാനും നമുക്ക് സാധിക്കും. ധ്യാനം ചെയ്യുന്നതിലൂടെ ക്ഷമയും ഏകാഗ്രതയും കൈവരിക്കാൻ കഴിയും..

        ആരെയും ദ്രോഹിക്കുന്ന വിധത്തിൽ ഒരു കർമ്മവും നാം ചെയ്യരുത്.അപ്രകാരം ആരെയെങ്കിലും ദ്വെഷിക്കണമെന്നോ ദ്രോഹിക്കണമെന്നോ  ചിന്ത ഉണ്ടായാൽ അവരെ നമ്മളുമായി താരതമ്യം ചെയ്ത് നോക്കുക. അതായത് അതേ ദ്രോഹം നമുക്ക് സംഭവിച്ചാലോ ..നാം എത്ര മാത്രം ദുഃഖിക്കും എന്ന് ആലോചിക്കുക. എല്ലാവരും നമ്മെ പോലെ തന്നെ ആണ് എന്ന് ചിന്തിക്കുക. നാം ആരോടും ദ്രോഹം ചെയ്യാതെ ഇരിക്കുക. 

             നമ്മോട് ദ്രോഹം ചെയ്യുന്നവരോട് ക്ഷമിക്കുക. കാരണം നാളെ നമുക്ക് ആരുടെ മുന്നിലും തല കുനിക്കേണ്ടി വരരുത്. ഇന്ന് ശത്രു ആയിരിക്കുന്ന ഒരാള് നാളെ മിത്രമായി മാറും. അതുപോലെ ഇന്നത്തെ മിത്രം നാളെ ശത്രു ആയേക്കാം.. അമിതമായി ആരോടും അടുപ്പം സൂക്ഷിക്കാതെ ഇരിക്കുക.ആരെയും വെറുക്കാതെ ഇരിക്കുക.. മിതമായി മാത്രം ഏവരോടും ഇടപഴകുക ..ബന്ധങ്ങൾ കൂടുതൽ ബലമുള്ളതാകാൻ മിതത്വം പാലിക്കുക തന്നെയാണ് നല്ലത്...ഏവർക്കും നന്മകൾ നേരുന്നു..ഏവരെയും ഈശ്വരൻ അനുഗ്രഹിക്കട്ടെ..നന്ദി.vasantha tk.