തകർന്നടിഞ്ഞു പരവൂർ-കൊല്ലം തീരദേശ പാത.

പരവൂർ :   തകർന്നടിഞ്ഞു പരവൂർ-കൊല്ലം തീരദേശ പാത അധികൃതർ ഉറക്കമാണ്. തീരദേശ പാതയിൽ നഗരസഭ പരിധിയിൽ പൊഴിക്കര ക്ഷേത്രം- പൊഴിക്കര ചീപ്പ് -കടപ്പുറം പാത, മയ്യനാട് പഞ്ചായത്ത് പരിധിയിൽ താന്നിയിൽ പൊഴി മുറിക്കുന്ന ഭാഗം വരെയുള്ള പാതയുമാണ് യാത്രക്കാരുടെ നടുവൊടിക്കുന്ന രീതിയിൽ പൊട്ടി പൊളിഞ്ഞത്. ഒരടിക്കു മുകളിൽ താഴ്ചയുള്ള ഗർത്തങ്ങളാണ് റോഡുകളിൽ പലയിടത്തായി ഉണ്ടായിരിക്കുന്നത്.

പൊഴിക്കര ദേവസ്വം ബോർഡ് ക്ഷേത്രത്തിനു മുൻവശത്ത് റോഡ് കാൽനടയാത്ര പോലും സാധ്യമാകാത്ത വിധത്തിൽ തകർന്നടിഞ്ഞു കിടക്കുകയാണ്. മഴ പെയ്താൽ റോഡും കുഴിയും തിരിച്ചറിയാത്ത വിധം വെള്ളക്കെട്ട് ഉണ്ടാകുന്നതു കാരണം ഇരുചക വാഹനങ്ങൾ അപകടത്തിൽ പെടുന്നതും പതിവാണ്. ചീപ്പ് പാലം കഴിഞ്ഞു തീരദേശത്തേക്കുള്ള പാതയിൽ കേബിളുകളും പൈപ്പുകളും സ്ഥാപിക്കാനെടുത്ത കുഴികൾ കാരണം വശങ്ങളിലൊക്കെ റോഡ് തകർന്നിരിക്കുകയാണ്. റോഡിന്റെ നിർമാണ പ്രവർത്തനങ്ങൾ നടക്കാത്തതിനാൽ ഒരു കിലോമീറ്റർ വരുന്ന റോഡ് 6 വർഷം മുൻപാണ് പൊതുമരാമത്ത് വകുപ്പിൽ നിന്ന് നഗരസഭ റോഡ് ഏറ്റെടുത്തത്.

അതിനു ശേഷം 16 ലക്ഷം രൂപ ചെലവാക്കി റോഡ് സഞ്ചാരയോഗ്യമാക്കിയുന്നു. തീരദേ നഗരസഭ അതിർത്തി വരെ ജി.എസ്.ജയലാൽ

എംഎൽഎയുടെ പ്രാദേശിക വികസന ഫണ്ട് ഉപയോഗിച്ചു തറയോടുകൾ പാകിയ ഭാഗം മാത്രമാണ് നിലവിൽ സഞ്ചാര യോഗ്യമായിട്ടുള്ളത്. ഇവിടെയും ഇന്റർലോക്ക് ഇളകി തുടങ്ങിയിരിക്കുന്നത്.

മയ്യനാട് പഞ്ചായത്ത് പരിധിയിൽ താന്നിയിൽ പൊഴി മുറിയുന്ന ഭാഗം വരെയുള്ള റോഡ് പൂർണമായും തകർന്നിരിക്കുകയാണ്. റോഡിന്റെ ഉടമസ്ഥവകാശം ഹാർബർ എൻജിനീയറിങ് വകുപ്പിനായതിനാൽ താന്നി പാത നവീകരിച്ചപ്പോൾ റോഡ് ഉൾപ്പെടുത്തിയിരുന്നില്ല. പരവൂരിലെ

 പ്രധാന വിനോദ സഞ്ചാര കേന്ദ്രമായ പൊഴിക്കര കടപ്പുറത്തേക്കുള്ള പാതയും തിരുവനന്തപുരം-കൊല്ലം തീരദേശ പാതയുടെ ഭാഗവുമായ റോഡാണ് 3 വർഷത്തിലധികമായി തകർന്നു കിടക്കുന്നത്.

@  നിരവധി ബസുകൾ സർവീസ് നടത്തിയിരുന്ന റോഡിൽ ഇപ്പോൾ റോഡിന്റെ ശോചനീയാവസ്ഥ കാരണം ഒരു സ്വകാര്യ ബസ് മാത്രമാണ് സർവീസ് നടത്തുന്നത്. ദേശീയ പാതയിലെ ഗതാഗത കുരുക്കിൽ അകപ്പെടാതെ പന്ത്രണ്ടു കിലോമീറ്ററിലധികം ലാഭിച്ച് യാത്രചെയ്യാൻ കഴിയുന്നതിനാൽ വാഹനയാത്രക്കാർക്ക് തീരദേശ റോഡിനോട് താത്‌പര്യം ഏറെയാണ്. നുറുകണക്കിന് വാഹനങ്ങളാണ് ദിനവും ഇതുവഴി കടന്നുപോകുന്നത്. ടൂറിസ്റ്റുകളും ധാരാളമായി എത്തുന്ന മേഖലകളായതിനാൽ എത്രയും വേഗം ടാറിംഗ് നടത്തി റോഡ് സഞ്ചാര യോഗ്യമാക്കണമെന്ന ആവശ്യം ശക്തമാകുകയാണ്. കരുനാഗപ്പളി മുതൽ കളിയിക്കാവിള വരെയുള്ള തീരദേശ കെ എസ്. ആർ.ടി.സി ബസ് സർവീസും വൈകുകയാണ്. രാവിലെ കരുനാഗപ്പളിയിൽ നിന്ന് ആരംഭിച്ച് കൊല്ലം, മയ്യനാട്, മുക്കം, പൊഴിക്കര, പരവൂർ, കാപ്പിൽ അഞ്ചുതെങ്ങ് വഴി തിരുവനന്തപുരം കളിയിക്കാവിളയിൽ എത്തിച്ചേരുന്ന ബസ് സർവീസ് ആണിത്. എത്രയും വേഗം ടാറിംഗ് നടത്തി റോഡ് സഞ്ചാരയോഗ്യമാക്കി സർവീസ് ആരംഭിക്കണമെന്നാണ് നാട്ടുകാരുടെ ആവശ്യം.

ഫോട്ടോ :പൊട്ടിപൊളിഞ്ഞു കിടക്കുന്ന പൊഴിക്കര ക്ഷേത്രത്തിന് മുന്നിലെ 

റോഡ്