ചാത്തന്നൂർ: ആദിച്ചനല്ലൂർച്ചിറ ടൂറിസം പദ്ധതിപ്രദേശത്തെ പാലം അപകടാവസ്ഥയിൽ. കൈവരി തകർന്ന പാലത്തിന്റെ കോൺക്രീറ്റ്‌ അടർന്നുതുടങ്ങി. മുപ്പതോളം ഏക്കർ വിസ്‌തൃതിയുള്ള ചിറയിൽ നിന്നും വെള്ളം കൃഷി ആവശ്യത്തിന് കൊണ്ട് പോകുന്ന ഷട്ടറുകൾ സ്ഥാപിച്ചിരിക്കുന്ന ചീപ്പ് പാലത്തിന്റെ അപകടാവസ്ഥ പരിഹരിക്കാൻ അധികൃതർ തയ്യാറായിട്ടില്ല. ചീപ്പിന്റെ ഷട്ടറുകൾ തുരുമ്പിച്ചു തകർന്നിരിക്കുകയാണ്‌. പാലം പുതുക്കി പണിയുന്നതിനും ആദിച്ചനല്ലൂർ ജംഗഷനിൽ നിന്നും കണ്ണനല്ലൂർ -വെളിച്ചിക്കാല റോഡിന്റെ പുനർനിർമ്മാണത്തിനുമായി ഫിഷറീസ് വകുപ്പിൽനിന്ന്‌ 1.25 കോടി അനുവദിച്ചിരുന്നു. എന്നാൽ തുടർനടപടികളുണ്ടായില്ലെന്നാണ് ആക്ഷേപം. ചിറ ടൂറിസം പദ്ധതിക്കരികിലൂടെയുള്ള ഈ റോഡ് പൂർണമായും തകർന്നനിലയിലാണ്. ആദിച്ചനല്ലൂർ വില്ലേജ് ഓഫീസ്, മൃഗാശുപത്രി, ആയുർവേദ ആശുപത്രി, അങ്കണവാടി, ആദിച്ചനല്ലൂർ പഞ്ചായത്ത് ഹയർ സെക്കൻഡറി സ്കൂൾ, ഡി.എഡ് (ടി.ടി.സി) സെന്റർ തുടങ്ങിയ സ്ഥാപനങ്ങളിലേക്ക് ദിനവും ഒട്ടേറെപ്പേരാണ് ഇതുവഴി കടന്നുപോകുന്നത്. അമിതഭാരം കയറ്റിയ വാഹനങ്ങൾ ഇതുവഴി പോകുന്നത് പാലത്തിനു കൂടുതൽ ബലക്ഷയമുണ്ടാക്കുന്നു. ഭാരം കയറ്റിയ ടിപ്പർ ലോറികളും നിരന്തരം കടന്ന് പോകുന്നുണ്ട്. ചീപ്പുപാലത്തോടു ചേർന്ന് പണിതിരുന്ന പാലം തകരാറിലായതിനാൽ നിലവിൽ ചീപ്പ് പാലത്തിൽക്കൂടിമാത്രമാണ് വാഹനങ്ങൾ കടന്നുപോകുന്നത്.പാലം ഏത്രയുംവേഗം പുതുക്കിപ്പണിയുന്നതിന് നടപടി വേണമെന്നാണ് നാട്ടുകാർ ആവശ്യപ്പെടുന്നത്.
ഫോട്ടോ : ആദിച്ചനല്ലൂർ ചിറപാലം
No comments:
Post a Comment