പദവിയുടെ വില അറിയാത്തവർ

തിരുവനന്തപുരം ജില്ലയിൽപെട്ട നാവായിക്കുളം പഞ്ചായത്തിൽ സ്ഥലംമാറി എത്തിയ പഞ്ചായത്ത് സെക്രട്ടറിക്കെതിരെ ഭരണസമിതിയുടെ നേതൃത്വത്തിൽ നടന്ന പ്രതിഷേധവും പഞ്ചായത്ത് പ്രസിഡന്റിന്റെ ആത്മഹത്യാ ശ്രമവും സംസ്ഥാനത്തെ തദ്ദേശ സ്വയംഭരണ സ്ഥാപനങ്ങളെ പൊതുവായി ബാധിച്ചിരിക്കുന്ന ഗുരുതരരോഗത്തിന്റെ ബാഹ്യലക്ഷണങ്ങൾ മാത്രമാണ്. പഞ്ചായത്തുകളിലും നഗരസഭകളിലും ഇതും ഇതിനുമപ്പുറവുമുള്ള നാടകീയവും ഉദ്വേഗഭരിതവുമായ സംഭവങ്ങൾ വർഷത്തിൽ പലതവണ അരങ്ങേറാറുണ്ട്. അടിപിടിയും കൂട്ടത്തല്ലും മാത്രമല്ല, വനിതാ മെമ്പർമാരെ ദേഹോപദ്രവം ഏല്പിക്കുന്ന നീചമായ പ്രവൃത്തികൾ വരെ നടക്കാറുണ്ട്. ഉന്മാദംമൂത്ത് കടുത്ത ഭ്രാന്തായെന്നു പറഞ്ഞതുപോലെ രാഷ്ട്രീയംമൂത്ത് എന്തും ചെയ്യാൻ മടിയില്ലാത്തവരായി ജനപ്രതിനിധികൾ മാറുകയാണ്. എതിരാളികളെ നിർവീര്യരാക്കാനും പരാജയപ്പെടുത്താനും ഏത് അടവും അവർ പുറത്തെടുക്കും. നാളെയും കാണേണ്ടവരും അന്യോന്യം മുഖത്തു നോക്കേണ്ടവരുമാണെന്ന വിചാരം പോലുമില്ലാതെയാണ് കൗൺസിൽ യോഗത്തിലെ പെരുമാറ്റം.

നാവായിക്കുളം ഗ്രാമപഞ്ചായത്തിൽ വെള്ളിയാഴ്ച നടന്ന പോരും പഞ്ചായത്ത് പ്രസിഡന്റിന്റെ ആത്മഹത്യാ ഭീഷണിയും പഞ്ചായത്ത് സെക്രട്ടറി ചാർജെടുക്കുന്നതിൽ പ്രതിഷേധിച്ചായിരുന്നു. രണ്ട് വർഷം മുമ്പ് ആരോപണങ്ങളെത്തുടർന്ന് സ്ഥലംമാറ്റപ്പെട്ട സെക്രട്ടറി പുതിയ ഉത്തരവ് സമ്പാദിച്ച് വീണ്ടും ചാർജെടുക്കാൻ എത്തിയതിലായിരുന്നു കോൺഗ്രസിന്റെ നേതൃത്വത്തിലുള്ള ഭരണസമിതിക്ക് പ്രതിഷേധം. എന്തുവന്നാലും സെക്രട്ടറിയെ ചാർജെടുക്കാൻ അനുവദിക്കില്ലെന്ന് അവർ വാശിപിടിച്ചതോടെ എതിർപക്ഷക്കാരും സംഘടിച്ചു. സംഘർഷം മൂക്കുന്നതിനിടയിലാണ് പഞ്ചായത്ത് പ്രസിഡന്റ് സെക്രട്ടറിയുടെ മുറിയിൽ കയറി കതകടച്ച് ഫാനിൽ കെട്ടിത്തൂങ്ങാൻ ശ്രമിച്ചത്. പൊലീസും പഞ്ചായത്ത് അംഗങ്ങളും ചേർന്ന്‌ വാതിൽ തള്ളിത്തുറന്ന് പ്രസിഡന്റിനെ അനുനയിപ്പിച്ച് താഴെയിറക്കിയതിനാൽ പഞ്ചായത്ത് വലിയൊരു അത്യാഹിതത്തിൽ നിന്ന് രക്ഷപ്പെട്ടു.

പഞ്ചായത്ത് മേലധികാരികളുടെ നിയമപരമായ ഉത്തരവുമായി ചാർജെടുക്കാനെത്തിയ സെക്രട്ടറിയെ തടയാൻ ഇത്രയേറെ സാഹസിക യത്നങ്ങൾ നടത്തേണ്ടിയിരുന്നോ എന്ന് പലരും സംശയിച്ചേക്കും. എന്നാൽ തദ്ദേശ സ്ഥാപനങ്ങളിലെല്ലാം ഇപ്പോൾ സ്ഥിതി ഏറക്കുറെ ഇത്തരത്തിലാണ്. തങ്ങൾക്ക് അനഭിമതരായ ഉദ്യോഗസ്ഥരെ ഓടിക്കാൻ ഭരണസമിതി ഏതറ്റം വരെയും പോകും. ഇപ്പോൾ സ്ഥലംമാറി വന്ന സെക്രട്ടറി മാത്രമല്ല, മുൻപ് ഇരുന്നവരിൽ പലരെയും ഭരണസമിതി ഇതുപോലെ ഓടിച്ചു വിട്ടിട്ടുണ്ടെന്നാണ് അറിയാൻ കഴിയുന്നത്. സെക്രട്ടറിമാർ വാഴാത്ത പഞ്ചായത്ത് എന്ന ദുഷ്പേരുണ്ടായതും അങ്ങനെയാണ്. മൂന്നുവർഷത്തിനിടെ പത്തോളം സെക്രട്ടറിമാരാണ് ഇവിടെ പ്രവർത്തിച്ചതെന്നതിൽ നിന്നുതന്നെ ഇത് ബോദ്ധ്യമാകും. സെക്രട്ടറിമാരുടെ കൂടക്കൂടെയുള്ള മാറ്റം കാരണം പഞ്ചായത്ത് ഭരണം പ്രതിസന്ധിയിലാകുന്നതിൽ നാട്ടുകാർക്ക് ഉത്കണ്ഠയുണ്ട്. സെക്രട്ടറിമാർ വാഴാത്തതുകാരണം പഞ്ചായത്തിൽ വികസനമെല്ലാം മുടങ്ങുന്നു എന്നാണ് പരാതി. ദൈനംദിന പ്രവൃത്തികൾക്കും മുടക്കമുണ്ടാകുന്നതായി അവർ പറയുന്നു. എന്നാൽ സെക്രട്ടറിമാരുടെ കസേര ഉറയ്ക്കാത്തത് തങ്ങളുടെ നടപടികൾ മൂലമാണെന്ന് അംഗീകരിക്കാൻ ഭരണസമിതി തയ്യാറല്ല. അവിടെയാണ് ഇതിന് പിന്നിലെ രാഷ്ട്രീയക്കളി.

നാവായിക്കുളം പഞ്ചായത്തിനെപ്പോലെ രാഷ്ട്രീയ ചേരിപ്പോര് ഭരണം മുടക്കുന്ന ഒട്ടേറെ തദ്ദേശ സ്ഥാപനങ്ങൾ സംസ്ഥാനത്തുണ്ട്. ഭരണസമിതി യോഗങ്ങളിലെ വാഗ്വാദങ്ങൾ പലപ്പോഴും കൈയാങ്കളിയിലാകും അവസാനിക്കുക. ഭൂരിപക്ഷം തുലാസിൽ നിൽക്കുന്ന തദ്ദേശ സ്ഥാപനങ്ങളിലാണെങ്കിൽ അട്ടിമറി സാദ്ധ്യത എപ്പോഴും തലയ്ക്കുമുകളിലുണ്ടെന്നതിനാൽ സംഘർഷമൊഴിഞ്ഞ നേരം കാണില്ല. സെക്രട്ടറി ഉൾപ്പെടെയുള്ള ഉദ്യോഗസ്ഥർ എതിർ രാഷ്ട്രീയ ചായ്‌വ് പുലർത്തുന്നവരാണെങ്കിൽ ഭരണ സമിതിയുമായുള്ള എതിരിടൽ പഞ്ചായത്ത് ഭരണത്തിലും പ്രതിഫലിക്കും.

പഞ്ചായത്തിൽ ആരൊക്കെ ഏതു കസേരയിലിരിക്കണമെന്നു തീരുമാനിക്കാനുള്ള അധികാരം പഞ്ചായത്ത് വകുപ്പിനാണ്. തങ്ങളുടെ പഞ്ചായത്തിൽ ഇന്നയാൾ വേണ്ട എന്നു ശഠിക്കാൻ ഭരണസമിതിക്ക് അധികാരമില്ല. നാവായിക്കുളത്ത് പഞ്ചായത്ത് സെക്രട്ടറിയെ തുരത്താനായി ആത്മഹത്യാശ്രമം നടത്തിയ പ്രസിഡന്റ് ആ പദവിയുടെ അന്തസാണ് കെടുത്തിയത്. വൈകാരികമായല്ല ജനപ്രതിനിധികൾ ഇത്തരം പ്രശ്നങ്ങൾ കൈകാര്യം ചെയ്യേണ്ടത്. പഞ്ചായത്തിന്റെ നാഥനായി നിൽക്കേണ്ടയാൾ പഞ്ചായത്ത് വാസികൾക്കും നാഥനാകണം. കൂടെ നിൽക്കുന്നവരുടെ കൈയടി കിട്ടുമെങ്കിലും ഇതുപോലുള്ള എടുത്തുചാട്ടങ്ങൾ അംഗീകരിക്കാൻ പൊതുസമൂഹത്തിന് സാധിക്കില്ല. സാധാരണയിൽ കവിഞ്ഞ പക്വതയും വിവേകപൂർവമായ പെരുമാറ്റവുമാണ് ജനങ്ങൾ ഇങ്ങനെയുള്ളവരിൽ നിന്നു പ്രതീക്ഷിക്കുന്നത്.