@ മക്കൾക്ക് വിദ്യാഭ്യാസ ആനുകൂല്യം നഷ്‌ടപ്പെടുമെന്ന ആശങ്കയിൽ രക്ഷിതാക്കൾ
പരവൂർ : മയ്യനാട്ട് മത്സ്യത്തൊഴിലാളി ക്ഷേമനിധി ബോർഡ് ഓഫീസർ ഇല്ലാത്തത് മത്സ്യത്തൊഴിലാളികളെ വലയ്ക്കുന്നു. വിദ്യാഭ്യാസ സ്കോളർഷിപ്പിൻ്റെ സമയമായതിനാൽ മത്സ്യത്തൊഴിലാളിയാണെന്നു തെളിയിക്കുന്ന സാക്ഷ്യപത്രം വാങ്ങാൻ തൊഴിലാളികൾ നെട്ടോട്ടമാണ്. പരവൂരിലുള്ളവർ മയ്യനാട് മത്സ്യഭവൻ ഓഫീസിനെയാണ് ആശ്രയിക്കുന്നത്. എന്നാൽ ക്ഷേമനിധിയുടെ ചുമതലയുള്ള മത്സ്യത്തൊഴിലാളി ക്ഷേമനിധി ബോർഡ് ഓഫീസറുടെ തസ്‌തിക ഒഴിഞ്ഞുകിടക്കുകയാണ്. തിരുവനന്തപുരം ജില്ലയിലെ ഉദ്യോഗസ്ഥനാണ് അധികച്ചുമതല നൽകിയിരിക്കുന്നത്. ബുധനാഴ്‌ചയും ശനിയാഴ്‌ചയും ഉച്ചവരെയാണ് ഓഫീസ് പ്രവർത്തനമുള്ളത്.
പരവൂർ, മയ്യനാട്, ഇരവിപുരം മേഖലയിലുള്ള മൂവായിരത്തോളം തൊഴിലാളികൾ ഓഫീസിനെ ആശ്രയിക്കുന്നുണ്ട്. മക്കളുടെ വിവാഹധനസഹായം, ചികിത്സാധനസഹായം, മരണാനന്തരധനസഹായം, വാർഷിക അംശദായം അടയ്ക്കൽ തുടങ്ങിയവയ്ക്കും മയ്യനാട്ടെ ഓഫീസിലെത്തണം. അവിടെ എത്തുമ്പോൾ ഏതെങ്കിലും സാഹചര്യത്തിൽ ഉദ്യോഗസ്ഥൻ എത്തിയില്ലെങ്കിൽ നിരാശരാകേണ്ടിവരും.
മത്സ്യബന്ധനവുമായി ബന്ധപ്പെട്ട ജോലികൾ ഉച്ചയോടെയാണ് അവസാനിക്കുന്നത്. അതുകഴിഞ്ഞ് മയ്യനാട്ട് എത്തുമ്പോഴേക്കും ഓഫീസിന്റെ പ്രവർത്തനസമയം കഴിയുന്ന സ്ഥിതിയാണ്. ആളുകൾ കൂട്ടമായി എത്തുന്നതോടെ തിരക്ക് കൂടും. വിദ്യാഭ്യാസ സ്കോളർഷിപ്പിന് സാക്ഷ്യപത്രം സമർപ്പിക്കാൻ ചില സ്‌കൂളുകൾ 31 ആണ് അവസാനതീയതി നൽകിയിരിക്കുന്നത്. അതിനാൽ സാക്ഷ്യപത്രം സംഘടിപ്പിക്കാനുള്ള നെട്ടോട്ടത്തിലാണ് തൊഴിലാളികൾ. പരവൂരിലെ മത്സ്യഭവൻ ഓഫീസ് ഇപ്പോൾ തുറന്നുപ്രവർത്തിക്കുന്നുണ്ട്. ക്ഷേമനിധി ഓഫീസിൻ്റെ സൗകര്യം ഇവിടെ ഏർപ്പെടുത്തണമെന്നത് ഏറെക്കാലമായുള്ള ആവശ്യമാണ്. മന്ത്രി സജി ചെറിയാൻ പങ്കെടുത്ത തീരദേശസദസ്സിലും വിഷയം ഉന്നയിച്ചു.
രണ്ടുദിവസം പരവൂരിൽ മത്സ്യത്തൊഴിലാളി ക്ഷേമനിധി ബോർഡ് ഓഫീസ് പ്രവർത്തിപ്പിക്കുന്നത് ആലോചിക്കാമെന്ന് മന്ത്രി അന്ന് അറിയിച്ചിരുന്നു. എന്നാൽ പിന്നീട് നടപടിയുണ്ടായില്ല.
