ചാത്തന്നൂർ: മാലിന്യസംസ്കരണ പ്രവർത്തനങ്ങളിൽ പുതിയ മാതൃകകൾ സൃഷ്ടിച്ച് ചാത്തന്നൂർ നിയോജകമണ്ഡലത്തെ ശുചിത്വത്തിന്റെ മാതൃകാ കേന്ദ്രമാക്കി മാറ്റുന്നതിനായി 'നിർമലം – പുതുയുഗ ശുചിത്വ കേരളം' എന്ന പേരിൽ സമഗ്രമായ ക്യാമ്പയിൻ നടപ്പിലാക്കും ഇതുമായി ബന്ധപ്പെട്ട് ചേർന്ന നിയോജകമണ്ഡലതല ആലോചനായോഗം മിനി സിവിൽസ്റ്റേഷനിൽ നടന്നു
ബി.ബി. ഗോപകുമാർ എം എൽ എ
അധ്യക്ഷത വഹിച്ചു.
തദ്ദേശ സ്വയംഭരണ വകുപ്പ് അസിസ്റ്റന്റ് ഡയറക്ടർ എസ്. സുനീഷ് കുമാർ പദ്ധതിയുടെ അവതരണം നടത്തി. തുനീഷ് വാഴപ്പള്ളി വിഷയാവതരണം നടത്തി
മാലിന്യം ശേഖരിച്ച് നീക്കം ചെയ്യുന്നതിൽ മാത്രം ഒതുങ്ങാതെ, ഉറവിടത്തിൽ തന്നെ മാലിന്യം സംസ്കരിക്കുകയും മാലിന്യത്തിൽനിന്ന് മൂല്യവർധിത ഉൽപ്പന്നങ്ങൾ സൃഷ്ടിക്കുകയും ചെയ്യുന്ന സുസ്ഥിരമായ മാലിന്യസംസ്കരണ മാതൃക വികസിപ്പിക്കേണ്ടതിന്റെ ആവശ്യകത യോഗം ചർച്ച ചെയ്തു.
വീടുകളിലും സ്ഥാപനങ്ങളിലും സ്ഥാപിച്ചിട്ടുള്ള കമ്പോസ്റ്റ് ബിന്നുകൾ, ബയോബിന്നുകൾ, ബയോഗ്യാസ് പ്ലാന്റുകൾ തുടങ്ങിയ സംവിധാനങ്ങളുടെ എണ്ണം മാത്രം വിലയിരുത്തുന്നതിന് പകരം അവ യഥാർത്ഥത്തിൽ പ്രവർത്തിക്കുന്നുണ്ടോ, എത്ര വീടുകളിൽ ഫലപ്രദമായി ഉറവിട മാലിന്യസംസ്കരണം നടക്കുന്നുണ്ട് എന്നതിനെ അടിസ്ഥാനമാക്കി പ്രവർത്തനങ്ങൾ നിരന്തരമായി നിരീക്ഷിക്കാനും വിലയിരുത്താനും പ്രത്യേക പ്രാധാന്യം നൽകും.
ഓരോ തദ്ദേശ സ്വയംഭരണ സ്ഥാപനത്തിന്റെയും പ്രത്യേകതകൾ പരിഗണിച്ച് പ്രാദേശിക വിഭവങ്ങൾ പ്രയോജനപ്പെടുത്തിയും ജനപങ്കാളിത്തം ഉറപ്പാക്കിയും ശുചിത്വ പ്രവർത്തനങ്ങൾ കൂടുതൽ ഫലപ്രദമാക്കുന്നതിനുള്ള കർമപദ്ധതി തയ്യാറാക്കും. മാലിന്യത്തെ ഒരു വിഭവമായി മാറ്റി പ്രാദേശിക സംരംഭങ്ങൾക്കും മൂല്യവർധിത ഉൽപ്പന്നങ്ങളുടെ ഉൽപ്പാദനത്തിനും സാധ്യതകൾ കണ്ടെത്തുന്നതിനും ക്യാമ്പയിൻ ലക്ഷ്യമിടുന്നു.
ചാത്തന്നൂർ നിയോജകമണ്ഡലത്തെ മാലിന്യമുക്തവും സുസ്ഥിരവുമായ ശുചിത്വ മാതൃകയാക്കി ഉയർത്തുന്നതിനുള്ള സമഗ്ര ആക്ഷൻ പ്ലാൻ തയ്യാറാക്കാനും പ്രവർത്തനങ്ങളുടെ പുരോഗതി വിലയിരുത്തുന്നതിനായി തുടർയോഗങ്ങൾ സംഘടിപ്പിക്കാനും തീരുമാനിച്ചു.
യോഗത്തിൽ പരവൂർ നഗരസഭാ ചെയർപേഴ്സൺ ജെ.ജയലാൽ ഉണ്ണിത്താൻ,ഇത്തിക്കര ബ്ലോക്ക് പഞ്ചായത്ത് പ്രസിഡന്റ് സുശീലാദേവി,
ഗ്രാമപഞ്ചായത്ത് പ്രസിഡന്റുമാരായ
അഡ്വ. ജിനോക്കി എഡ്വേർഡ്,. ഉല്ലാസ് കൃഷ്ണൻ, ശശികല, ഒ. മഹേശ്വരി
പൂതക്കുളം ഗ്രാമപഞ്ചായത്ത് വൈസ് പ്രസിഡന്റ് ഇന്ദു എസ്. എന്നിവർ സംസാരിച്ചു.
@ നിർമലം – പുതുയുഗ ശുചിത്വ കേരളം' ക്യാമ്പയിൻ കേരളത്തെ മാലിന്യമുക്തവും ശുചിത്വസമ്പന്നവുമായ സംസ്ഥാനമാക്കി മാറ്റുന്നതിനുള്ള സമഗ്ര ശുചിത്വ പ്രവർത്തനങ്ങൾക്ക് ഊന്നൽ നൽകുന്ന പദ്ധതിയാണ്.
@ വീടുകളിലും സ്ഥാപനങ്ങളിലും മാലിന്യസംസ്കരണം ഉറപ്പാക്കുക.
@ പൊതുസ്ഥലങ്ങളും ജലാശയങ്ങളും മാലിന്യമുക്തമാക്കുക.
@ ഹരിതകർമസേനയുടെ പ്രവർത്തനം ശക്തിപ്പെടുത്തുക.
@ ഉറവിട മാലിന്യസംസ്കരണം വ്യാപകമാക്കുക.
@ നിരോധിത പ്ലാസ്റ്റിക് ഉപയോഗത്തിനെതിരെ നടപടി.
@ വിദ്യാലയങ്ങൾ കേന്ദ്രീകരിച്ച് ശുചിത്വ ബോധവത്കരണം.
