തപസ്യ കലാസാഹിത്യവേദി രൂപംകൊണ്ടത് 1975-ലെ അടിയന്തരാവസ്ഥയുടെ ഇരുണ്ട കാലഘട്ടത്തിലാണെങ്കിലും അതിന് മുമ്പുതന്നെ, കേരളം ആഗ്രഹിച്ചിരുന്ന ഒന്നായിരുന്നു അത്. ചെറിയതോതില്‍ കോഴിക്കോട്ട്, പട്ടത്താനം നടക്കുന്ന തളിക്ഷേത്രപരിസരത്തുള്ള സാമൂതിരിഹൈസ്‌കൂളില്‍ ഒരു സാഹിത്യസായാഹ്നം തുടക്കംകുറിച്ചിരുന്നു. സ്വാതന്ത്ര്യാനന്തരകേരളത്തിന്റെ നവോത്ഥാനത്തിനാക്കം കൂട്ടാനും വൈദേശിക കടന്നുകയറ്റങ്ങളാല്‍ മൂല്യത്തകര്‍ച്ചയില്‍നിന്നും മോചനം നേടാനുമാണ് തപസ്യ രൂപംകൊണ്ടത്.
കേസരി ബാലകൃഷ്ണപിള്ളയുടെയും സ്വദേശാഭിമാനി രാമകൃഷ്ണപിള്ളയുടെയും പത്രപ്രവര്‍ത്തനവും കോഴിക്കോട് സ്വാതന്ത്ര്യസമരനായകന്മാര്‍ തുടങ്ങിയ ‘മാതൃഭൂമി’ പത്രത്തിന്റെ നായകസ്ഥാനത്തിരുന്ന കെ.പി. കേശവമേനോന്‍, വി.എം. കൊറാത്ത്, സി.എച്ച്. കുഞ്ഞപ്പ, കേളപ്പജി എന്നിവരില്‍ നിന്ന് ലഭിച്ച പ്രചോദനവും കോഴിക്കോടുനിന്ന് പ്രസിദ്ധീകരിച്ചുതുടങ്ങിയ ‘കേസരി’ വാരികയും തപസ്യയുടെ തുടക്കത്തിന് പ്രേരണയായി.
കേരളത്തിലെ സാഹിത്യനായകന്മാരുടെ വാര്‍ഷിക ഒത്തുചേരലിന് കളമൊരുക്കിയിരുന്ന സാഹിത്യപരിഷത്ത് നാമമാത്രമായി അണിയറയിലേയ്ക്കു മാറിയപ്പോള്‍, വൈദേശികാശയങ്ങള്‍ പ്രചരിപ്പിക്കാന്‍ തല്‍പരകക്ഷികള്‍ ഒട്ടനവധി പ്രസ്ഥാനങ്ങളും പ്രസിദ്ധീകരണങ്ങളുമായി രംഗത്തുവന്നുകഴിഞ്ഞിരുന്നു. ഈ സാഹചര്യത്തില്‍ തപസ്യ നടത്തിയ ഓരോ വാര്‍ഷികസമ്മേളനവും അഖിലഭാരതീയ പ്രശസ്തരും ജ്ഞാനപീഠപുരസ്‌കര്‍ത്താക്കളും ഒത്തുചേരുന്ന ശ്രദ്ധേയമായ സാംസ്‌കാരികസംരംഭങ്ങളായിരുന്നു. പഴയതും പുതിയതുമായ കലാസാഹിത്യകാരന്മാരുടെ കഴിവുകള്‍ മാറ്റുരക്കുന്ന സമ്മേളനങ്ങള്‍ കേരളത്തിലെ ഓരോ ദിക്കിലും നടക്കുമ്പോള്‍ അവ കേരളത്തിന്റെ മാമാങ്കങ്ങളായി മാറിക്കൊണ്ടിരുന്നു. പ്രൊഫ. അഴീക്കോടും തിക്കോടിയനും എം.ടി.യും എം.വി. ദേവനും അക്കിത്തവും ഇത്തരം സമ്മേളനങ്ങളില്‍ക്കൂടി തപസ്യയെ ശക്തമായി മുന്നോട്ടുനയിച്ചു. തപസ്യയുടെ അദ്ധ്യക്ഷസ്ഥാനത്തും അധികാരസ്ഥാനത്തും ഇരുന്നുകൊണ്ട് തപസ്യയെ നയിച്ചവര്‍ അനവധിയാണ്. അതിനിടയ്ക്കാണ്, കേരള സംസ്‌കാരധാരയെ കണ്ടെത്താനുള്ള പരിശ്രമമെന്ന നിലയില്‍ മഹാകവി അക്കിത്തത്തിന്റെ നേതൃത്വത്തില്‍ കന്യാകുമാരിയില്‍നിന്നും ഗോകര്‍ണത്തേയക്ക് ഒരു സാംസ്‌കാരികതീര്‍ത്ഥയാത്ര നടത്തിയത്.
തപസ്യ 25 വര്‍ഷം മുമ്പ് നടത്തിയ സാംസ്‌കാരികയാത്രയുടെ പശ്ചാത്തലമല്ല ഇന്നുള്ളത്. സാമൂഹ്യസാമുദായികരംഗത്തും കക്ഷിമതരാഷ്ട്രീയരംഗത്തും പല മാറ്റങ്ങളും സംഭവിച്ചിട്ടുണ്ട്. അവയെയെല്ലാം പരിഗണിച്ചാണ് രണ്ട് തീര്‍ത്ഥയാത്ര നടത്താന്‍ നിശ്ചയിച്ചത്. ഭാഷയുടെ അടിസ്ഥാനത്തില്‍ ഒരുകാലത്ത് സംസ്ഥാനം രൂപീകരിച്ചുവെങ്കില്‍, ഭാഷ സംസ്‌കാരത്തിന്റെ സ്രോതസാണെന്നു മനസ്സിലാക്കാതെയും, ഭരണപരമായിപ്പോലും ഉപയോഗപ്പെടുത്താതെയും, മലയാളഭാഷയെ നശിപ്പിച്ചു എന്നുതന്നെ പറയേണ്ടിയിരിക്കുന്നു. അതേസമയം, സാംസ്‌കാരികപാരമ്പര്യത്തിന്റെ ഭാഗമായ മറ്റു ഏതാനും ഭാഷകളുണ്ടായിരുന്നതിനെ പാടെ ഉപേക്ഷിച്ചതുകൊണ്ട് കേരളത്തിന്റെ പൊതുസ്വഭാവം നഷ്ടപ്പെടുകയും ചെയ്തിട്ടുണ്ട്. മതവിഭജനത്തിന്റെ പേരില്‍ രാഷ്ട്രീയകക്ഷികള്‍ നിലവില്‍വന്നതും കേരളത്തിന്റെ സ്വത്തായ കാര്‍ഷികപാരമ്പര്യത്തെ അതേപടി തകര്‍ത്തതും മലയാളഭാഷയോടൊപ്പം സാമൂഹ്യസംവിധാനങ്ങളില്‍ മാറ്റംവരുത്തി. അതുകൊണ്ട് കുടുംബബന്ധങ്ങള്‍ തകര്‍ന്നു, പ്രകൃതിസമ്പത്തുകള്‍ കൊള്ളയടിക്കപ്പെട്ടു. ഇവയെല്ലാം കേരളം നേരിടുന്ന പ്രശ്‌നങ്ങളാണ്.
അതുകൊണ്ട് തപസ്യയുടെ രണ്ടാം സാംസ്‌കാരികതീര്‍ത്ഥയാത്ര ഊന്നുന്നത് പ്രകൃതിസമ്പത്തും സാംസ്‌കാരികപൈതൃകമേഖലയും ജനശ്രദ്ധയില്‍ കൊണ്ടുവരിക എന്ന പ്രത്യേകവിഷയത്തിലാണ്. സഹസ്രാബ്ദത്തിന്റെ പാരമ്പര്യമുള്ള കേരളം കന്യാകുമാരിമുതല്‍ ഗോകര്‍ണംവരെയായതുകൊണ്ട്, തീര്‍ത്ഥയാത്രയും ഈ പ്രദേശങ്ങളില്‍ക്കൂടി ആയിരിക്കും.
കേരളത്തിന്റെ അതിര്‍ത്തി പര്‍വ്വതവും കടലുമാണ്. ഇതിനോടു ചേര്‍ന്നുകാണുന്ന പ്രദേശങ്ങള്‍ കയ്യേറ്റംകൊണ്ട് തകര്‍ന്നിരിക്കുന്നു. അവിടുത്തെ പ്രകൃതിസമ്പത്ത് നഷ്ടപ്പെടുന്നു. ജനവിഭാഗം കഷ്ടപ്പെടുന്നു. അതുകൊണ്ട് തപസ്യയുടെ ഒരു സാംസ്‌കാരികതീര്‍ത്ഥയാത്ര കന്യാകുമാരിയില്‍ നിന്ന് പുറപ്പെട്ട് കടലോരംവഴി ഗോകര്‍ണം വരെയും മറ്റൊന്ന് ഗോകര്‍ണത്തുനിന്ന് പുറപ്പെട്ട് മലയോരം വഴി കന്യാകുമാരിവരെയുമാണ്. കലാസാഹിത്യരംഗത്തെ പ്രമുഖര്‍ നയിക്കുന്ന യാത്രാസംഘം സാമൂഹ്യപ്രശ്‌നം കൈകാര്യം ചെയ്യുന്ന കലാസംഘവും ഉള്‍പ്പെടുന്നതാണ്.
2016 ജനുവരി മൂന്നിന് മൂന്നു സമുദ്രങ്ങള്‍ സംഗമിക്കുന്ന കന്യാകുമാരിയില്‍ തുടക്കംകുറിക്കുന്ന യാത്ര സാംസ്‌കാരികപൈതൃങ്ങള്‍ സന്ദര്‍ശിച്ച് നെയ്യാറ്റിന്‍കര, ആറ്റിങ്ങല്‍, കൊല്ലം, ആലപ്പുഴ, എറണാകുളം വഴി, ഇരിങ്ങാലക്കുട, എടപ്പാള്‍, താനൂര്‍, കോഴിക്കോട്, തലശ്ശേരി, പയ്യന്നൂര്‍, കാസര്‍ഗോഡ്, ഉഡുപ്പി വഴി ഗോകര്‍ണേശനെ വണങ്ങി 18 ന് മടങ്ങും.
മലയോരയാത്ര, ഫെബ്രുവരി ഒന്നിന് ഗോകര്‍ണേശദര്‍ശനത്തിനുശേഷം മൂകാംബികയില്‍ ഉദ്ഘാടനം ചെയ്യും. തുടര്‍ന്ന് മടിക്കേരി, ചെറുപുഴ, കൊട്ടിയൂര്‍, അമ്പലവയല്‍, കുന്ദമംഗലം, നിലമ്പൂര്‍, പട്ടാമ്പി, മണ്ണാര്‍കാട്, പാലക്കാട്, തൃശൂര്‍, പെരുമ്പാവൂര്‍, നെടുങ്കണ്ടം, തൊടുപുഴ, കോട്ടയം, കൊട്ടാരക്കര, നെടുമങ്ങാട്, നാഗര്‍കോവില്‍ വഴി കന്യാകുമാരിയിലെത്തി ദേവീദര്‍ശനം കഴിഞ്ഞുമടങ്ങും. ഇതിനിടയില്‍ ചെറുതും വലുതുമായ പരമാവധി പൈതൃകസാംസ്‌കാരികകേന്ദ്രങ്ങള്‍ സന്ദര്‍ശിക്കാനും സാംസ്‌കാരികനായകന്മാരെ ആദരിക്കാനും തപസ്യ തയ്യാറെടുത്തിട്ടുണ്ട്.
തപസ്യയുമായി ബന്ധപ്പെട്ട എല്ലാ കലാ-സാഹിത്യസാംസ്‌കാരികനായകന്മാരെയും പങ്കാളികളാക്കുന്നുണ്ട്. സംസ്ഥാനഅദ്ധ്യക്ഷന്‍ എസ്. രമേശന്‍നായര്‍, രക്ഷാധികാരി പ്രൊഫ. തുറവൂര്‍ വിശ്വംഭരന്‍ എന്നിവര്‍ സാംസ്‌കാരികനായകന്മാര്‍ക്ക് നേതത്വം നല്‍കും. മഹാകവി അക്കിത്തം, കവി പി. നാരായണക്കുറുപ്പ്, കാവാലം നാരായണപ്പണിക്കര്‍ തുടങ്ങിയവരുടെ അനുഗ്രഹാശിസ്സുകളോടെ കടന്നുപോകുന്ന യാത്രയില്‍ ഓരോ ജില്ലയില്‍ നിന്നുമുള്ള പ്രശസ്ത വ്യക്തികളെ പങ്കാളികളാക്കും. മഠാധിപതികള്‍, സന്യാസിശ്രേഷ്ഠന്മാര്‍, സാംസ്‌കാരികസ്ഥാപനങ്ങള്‍ എല്ലാവരെയും പങ്കാളികളാക്കിയുള്ളതായിരിക്കും രണ്ടുമാസം നീണ്ടുനില്‍ക്കുന്ന ഈ സാംസ്‌കാരികതീര്‍ത്ഥയാത്ര.
ഓരോ ദിവസത്തെയും സന്ദര്‍ശനം അവസാനിക്കുന്ന കേന്ദ്രത്തില്‍ മഹാസമ്മേളനങ്ങളും സമാദരണങ്ങളും നടക്കും. ആധുനിക കേരളത്തിന്റെ നാനാവിധ പ്രശ്‌നങ്ങള്‍ക്കപ്പുറം സാംസ്‌കാരികപൈതൃകപശ്ചാത്തലത്തില്‍ കേരളത്തില്‍ വ്യക്തമായ പരിവര്‍ത്തനമുണ്ടാക്കാന്‍ കഴിയുന്നതായിരിക്കും ഈ സാംസ്‌കാരികതീര്‍ത്ഥയാത്രകള്‍.
കാല്‍നൂറ്റാണ്ടിനിപ്പുറം വീണ്ടും ഒരു യാത്രയ്ക്ക് ഒരുങ്ങുമ്പോള്‍ 40 വര്‍ഷത്തെ പ്രവര്‍ത്തനാനുഭവം സമ്മാനിച്ച സാംസ്‌കാരിക അവബോധവും, ഒരു സംഘടന എന്ന നിലയില്‍ ആര്‍ജ്ജിച്ച ഉള്‍ക്കരുത്തും സമൂഹം അഭിമുഖീകരിക്കുന്ന കൂടുതല്‍ സങ്കീര്‍ണ്ണങ്ങളായ പ്രശ്‌നങ്ങളെ ജനസമക്ഷം അവതരിപ്പിക്കുവാനും ഗൗരവപൂര്‍ണ്ണമായ വിശകലനങ്ങള്‍ക്ക് വിധേയമാക്കി പരിഹാരം തേടുവാനും തപസ്യയെ പ്രാപ്തമാക്കിയിരിക്കുന്നു.
സാംസ്‌കാരികജീര്‍ണ്ണതയില്‍പെട്ട് അപഥസഞ്ചാരം നടത്തുന്ന കേരള ജനസമൂഹത്തിന് അതിന്റെ പാരമ്പര്യ സംസ്‌കാര സ്രോതസ്സുകളെ അറിയുവാനും, അധികാരവും പണവും പദവിയും മാത്രം ഉന്നംവയ്ക്കുന്നവരുടെ ദുഷ്‌ചെയ്തികളിലൂടെ വികലമാകുന്ന സാംസ്‌കാരിക അന്തരീക്ഷത്തെ തുറന്നുകാട്ടുവാനും തപസ്യ ഈ യാത്രയില്‍ ഉയര്‍ത്തുന്ന മൂന്ന് സന്ദേശങ്ങളാണ് ‘എന്റെ ഭൂമി, എന്റെ ഭാഷ, എന്റെ സംസ്‌കാരം’. ആധുനികതാനാട്യത്തിന്റെ വിവേകരാഹിത്യത്താല്‍ നമുക്ക് നഷ്ടമാകുന്നത് നമ്മുടെ അമൂല്യമായ മാതൃഭാഷയും അത് സൃഷ്ടിക്കുന്ന അഭൗമമായ ചൈതന്യവുമാണ്. ധിഷണാ വൈഭവത്തിലും സൗന്ദര്യബോധത്തിന്റെ സാക്ഷാത്കാരത്തിലും ഏത് യൂറോപ്യന്‍ കലാസാഹിത്യമഹാരഥന്‍മാരെയും വെല്ലാന്‍ കഴിയുന്ന മഹാമനീഷികളായ സാഹിത്യകാരന്‍മാരുടെയും കലാകാരന്‍മാരുടെയും സംഭാവനകളും നമുക്ക് ആസ്വദിക്കാന്‍ പറ്റാതെ പോകുന്നു. വരുംതലമുറകളെ കരുപ്പിടിപ്പിക്കുവാനും അവരുടെ സര്‍ഗ്ഗശേഷിയെ വളര്‍ത്തുവാനും പര്യാപ്തമായവയാണ് അവ.
തീരദേശയാത്രയില്‍ നമ്മുടെ മനോഹരമായ കടല്‍ തീരങ്ങള്‍ നേരിടുന്ന രൂക്ഷമായ പ്രശ്‌നങ്ങളെ അനാവരണം ചെയ്യുവാനാണ് തപസ്യ ശ്രമിക്കുന്നത്. വര്‍ഗ്ഗീയവല്‍ക്കരണ ശ്രമങ്ങളും ഭീകരപ്രവര്‍ത്തനത്തിനുളള നിഗൂഢതാവളങ്ങളും തീരദേശത്തിന്റെ തീരാശാപമായി മാറിക്കൊണ്ടിരിക്കുന്ന അസ്ഥയ്ക്ക് നിത്യമായ പരിഹാരം കണ്ടെത്തുവാനും കടലോര ജനതയുടെ സൈ്വരജീവിതം യാഥാര്‍ത്ഥ്യമാക്കുവാനും ജനമനസ്സ് ഉണരേണ്ടതുണ്ട്. തപസ്യ അതുകൊണ്ടുതന്നെ ഈ യാത്ര ഒരു പവിത്ര കര്‍മ്മമായി കണ്ട് തീരഭൂവിന്റെ നഷ്ടചൈതന്യത്തെ വീണ്ടെടുക്കുന്ന യജ്ഞമായി പൂര്‍ത്തീകരിക്കാന്‍ ശ്രമിക്കുകയാണ്.
സാംസ്‌കാരിക തീര്‍ത്ഥാടനത്തിന്റ രണ്ടാം ഘട്ടം സഹ്യാദ്രി യാത്രയാണ്. നമ്മുടെ പ്രകൃതിയെ രക്ഷിക്കുന്നതിന് മലയാളിക്ക് സമര്‍പ്പിക്കുന്ന ഒരുണര്‍ത്ത് പാട്ടായിരിക്കും ഈ യാത്ര. മരമരിഞ്ഞും മലയരിഞ്ഞും പ്രചണ്ഡമായി മുന്നേറുന്ന ആര്‍ത്തിപണ്ടാരങ്ങളുടെ ദുര ശമിപ്പിക്കുവാനും മനുഷ്യമനസ്സുകളെ സഹ്യാദ്രിയെന്ന മഹാമേരുവിന്റെ ജൈവാമൃതശേഖരത്തിന്റെ മനോഹാരിത തുറന്നു കാട്ടുന്നതിനുമാണ് ഈ യാത്ര. സംസ്‌കാരത്തിന്റെ നിധികുംഭങ്ങള്‍ മാത്രമല്ല സഹ്യന്‍, അത് നമ്മുടെ പാരിസ്ഥിതിക സംരക്ഷണത്തിനുള്ള ഈശ്വരന്റെ വരദാനമാണ് എന്നും തിരിച്ചറിയേണ്ടതുണ്ട്.
ഈ യാത്രകളിലൂടെ സംഘടിപ്പിക്കപ്പെടുന്ന 20ഓളം മഹാസമ്മേളനങ്ങളും യാത്രയോടൊപ്പം സഞ്ചരിക്കുന്ന കലാകാരന്‍മാര്‍ അവതരിപ്പിക്കുന്ന മനസ്സുണര്‍ത്തുന്ന പരിപാടികളും, വേദികളില്‍ ആദരിക്കപ്പെടുന്ന ഓരോ പ്രദേശത്തെയും കലാസാഹിത്യ പ്രമുഖരുടെ സാന്നിദ്ധ്യവും, ചെറുസ്വീകരണങ്ങളും എല്ലാംകൂടി സൃഷ്ടിക്കാന്‍ പോകുന്നത് തികച്ചും ജീവസ്സുറ്റ ഒരു സാംസ്‌കാരിക പൈതൃകത്തിന്റെ നവോത്ഥാനമായിരിക്കും.
No comments:
Post a Comment